ନୂଆଦିଲ୍ଲୀ: ଭାରତୀୟ କ୍ରିକେଟ୍ ଦଳର ମୁଖ୍ୟ କୋଚ୍ ଗୌତମ ଗମ୍ଭୀର ଦକ୍ଷିଣ ଆଫ୍ରିକା ବିପକ୍ଷ ଟେଷ୍ଟ୍ ସିରିଜରେ ଦଳର ପରାଜୟ ପରେ ଦେଶରେ ‘ସ୍ପ୍ଲିଟ୍ କୋଚିଂ’ ବା ପୃଥକ କୋଚ୍ ନିଯୁକ୍ତି ପାଇଁ ଦାବି କରିଥିବା ସମାଲୋଚକଙ୍କ ଉପରେ କଡ଼ା ଆକ୍ରମଣ କରିଛନ୍ତି। ବିଶେଷ କରି ସେ ଦିଲ୍ଲୀ କ୍ୟାପିଟାଲ୍ସର ସହ-ମାଲିକ ପାର୍ଥ ଜିନ୍ଦଲଙ୍କୁ ଟାର୍ଗେଟ୍ କରିଛନ୍ତି, ଯିଏ ବିସିସିଆଇକୁ ଟେଷ୍ଟ କ୍ରିକେଟ୍ ପାଇଁ ଅଲଗା କୋଚ୍ ନିଯୁକ୍ତ କରିବାକୁ କହିଥିଲେ।
ଗମ୍ଭୀର କହିଛନ୍ତି ଯେ ଲୋକେ ନିଜ ନିଜର ସୀମା ଭିତରେ ରହିବା ଉଚିତ ଏବଂ କ୍ରିକେଟ୍ ସହ ସମ୍ପର୍କ ନଥିବା କଥା କହିବା ଠାରୁ ବିରତ ରହିବା ଆବଶ୍ୟକ।
ବିଶାଖାପାଟଣାରେ ଭାରତ ଦକ୍ଷିଣ ଆଫ୍ରିକାକୁ ତୃତୀୟ ଦିନିକିଆରେ ୯ ୱିକେଟରେ ହରାଇ ୨-୧ରେ ସିରିଜ୍ ଜିତିବା ପରେ ଗମ୍ଭୀର ଏହି ପ୍ରତିକ୍ରିୟା ଦେଇଛନ୍ତି। ସେ କହିଛନ୍ତି, କିଛି ଲୋକ ଏମିତି କଥା କହିଲେ ଯାହାର କ୍ରିକେଟ୍ ସହ କୌଣସି ସମ୍ପର୍କ ନାହିଁ। ଜଣେ ଆଇପିଏଲ୍ ଦଳର ମାଲିକ (ପାର୍ଥ ଜିନ୍ଦଲ) ମଧ୍ୟ ସ୍ପ୍ଲିଟ୍ କୋଚିଂ ବିଷୟରେ ଲେଖିଥିଲେ। ଏହା ଅତ୍ୟନ୍ତ ଆଶ୍ଚର୍ଯ୍ୟଜନକ।”
ଗମ୍ଭୀର କଡ଼ା ସ୍ୱରରେ କହିଛନ୍ତି, ଲୋକମାନେ ନିଜ କ୍ଷେତ୍ରରେ ରହିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ, କାରଣ ଯଦି ଆମେ କାହାର କ୍ଷେତ୍ରକୁ ଯିବା ନାହିଁ, ତେବେ ସେମାନଙ୍କର ମଧ୍ୟ ଆମର କ୍ଷେତ୍ରକୁ ଆସିବାର ଅଧିକାର ନାହିଁ।
ଦିଲ୍ଲୀ କ୍ୟାପିଟାଲ୍ସର ସହ-ମାଲିକ ପାର୍ଥ ଜିନ୍ଦଲ, ଟେଷ୍ଟ୍ ସିରିଜ୍ ପରାଜୟ ପରେ ‘X’ (ଟ୍ୱିଟର) ରେ ଲେଖିଥିଲେ, ‘କୌଣସି ମତେ ନୁହେଁ, ଘରୋଇ ମାଟିରେ ଏକ ସମ୍ପୂର୍ଣ୍ଣ ବିଧ୍ୱଂସ! ମୋର ମନେ ନାହିଁ ଆମ ଟେଷ୍ଟ୍ ଦଳକୁ ଘରେ ଏତେ ଦୁର୍ବଳ ଦେଖିଥିଲି କେବେ, ଏହା ହିଁ ହୁଏ ଯେତେବେଳେ ରେଡ୍ ବଲ୍ ସ୍ପେଶାଲିଷ୍ଟଙ୍କୁ ବଛାଯାଏ ନାହିଁ… ଭାରତ ପାଇଁ ଏକ ସ୍ପେଶାଲିଷ୍ଟ ରେଡ୍-ବଲ୍ କୋଚ୍ ଆଣିବାର ସମୟ ଆସିଛି।’
ଗମ୍ଭୀର ମଧ୍ୟ ଗଣମାଧ୍ୟମ ଉପରେ ଅସନ୍ତୋଷ ବ୍ୟକ୍ତ କରିଛନ୍ତି ଯେ ଅଧିନାୟକ ଶୁବମାନ ଗିଲ୍ ପ୍ରଥମ ଟେଷ୍ଟରେ ବେକ ଯନ୍ତ୍ରଣା କାରଣରୁ ପ୍ରଥମ ଇନିଂସରେ ୪ଟି ବଲ୍ ଖେଳିବା ପରେ ଓହରି ଯାଇଥିଲେ ଏବଂ ଦ୍ୱିତୀୟ ଇନିଂସରେ ବ୍ୟାଟିଂ କରିପାରିନଥିଲେ, ଯାହାକୁ କାହିଁକି ଆଲୋଚନାକୁ ଅଣାଗଲା ନାହିଁ।
ସେ କହିଛନ୍ତି, ବହୁତ କଥା ହେଲା, କାରଣ ଫଳାଫଳ ଆମ ସପକ୍ଷରେ ଗଲାନି। କିନ୍ତୁ ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି କୌଣସି ଗଣମାଧ୍ୟମ କିମ୍ବା ସାମ୍ବାଦିକ ଏକଥା ଥରଟିଏ ମଧ୍ୟ ଲେଖିଲେ ନାହିଁ ଯେ ଆମର ପ୍ରଥମ ଟେଷ୍ଟ୍ ମ୍ୟାଚ୍ ଅଧିନାୟକ (ଶୁବମାନ ଗିଲ୍)ଙ୍କ ବିନା ଖେଳାଯାଇଥିଲା। ଯେତେବେଳେ ଆପଣ ଏକ ପରିବର୍ତ୍ତନ ଦେଇ ଗତି କରୁଛନ୍ତି ଏବଂ ରେଡ୍-ବଲ୍ କ୍ରିକେଟରେ ଆପଣଙ୍କର ଅଧିନାୟକ ତଥା ମୁଖ୍ୟ ବ୍ୟାଟର (ଶୁବମାନ ଗିଲ୍)ଙ୍କୁ ହରାଉଛନ୍ତି, ସେତେବେଳେ ଫଳାଫଳ କଷ୍ଟକର ହେବା ସ୍ୱାଭାବିକ।
ଗମ୍ଭୀରଙ୍କ ଏହି କଡ଼ା ଆଭିମୁଖ୍ୟ ବାହ୍ୟ ସମାଲୋଚନାକୁ ଦୃଢ଼ ଜବାବ ଦେଇଛି ଏବଂ କ୍ରିକେଟ୍ ପରିଚାଳନାରେ ଅଣ-କ୍ରିକେଟିଙ୍ଗ୍ ବ୍ୟକ୍ତିମାନଙ୍କ ହସ୍ତକ୍ଷେପ ଉପରେ ଏକ ଗୁରୁତ୍ୱପୂର୍ଣ୍ଣ ପ୍ରଶ୍ନବାଚୀ ସୃଷ୍ଟି କରିଛି।
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
