ବିଧାନସଭାର ଚାଲିଥିବା ଶୀତ ଅଧିବେଶନ ଆଜି ଏକ ଗୁରୁତ୍ୱପୂର୍ଣ୍ଣ ଦିନରେ ଅର୍ଥାତ୍ ଦଶମ ଦିନରେ ପହଞ୍ଚିଛି । ରାଜନୈତିକ ଦୃଷ୍ଟିକୋଣରୁ ଆଜିର ଦିନଟି ବେଶ୍ ମହତ୍ତ୍ୱପୂର୍ଣ୍ଣ । ଦିନର ଆରମ୍ଭରେ ଗୃହ କାର୍ଯ୍ୟ ସମ୍ପୂର୍ଣ୍ଣ ସ୍ୱାଭାବିକ ରହିଥିଲା । ପ୍ରଶ୍ନକାଳ କାର୍ଯ୍ୟକ୍ରମ କୌଣସି ବାଧାବିଘ୍ନ ନଥାଇ ସୁରୁଖୁରୁରେ ଚାଲିଥିଲା ଏବଂ ବିଧାୟକମାନେ ରାଜ୍ୟର ବିଭିନ୍ନ ମୌଳିକ ସମସ୍ୟା ଯେପରିକି ପାନୀୟ ଜଳ, ଶିକ୍ଷା ଓ ଗମନାଗମନ ଉପରେ ପ୍ରଶ୍ନ କରିଥିଲେ । ବିଭାଗୀୟ ମନ୍ତ୍ରୀମାନେ ମଧ୍ୟ ଏହାର ସନ୍ତୋଷଜନକ ଉତ୍ତର ରଖିଥିଲେ ।
ଆଜିର ପ୍ରଶ୍ନକାଳରେ ଗୃହ, ଅର୍ଥ, ସ୍ୱାସ୍ଥ୍ୟ, ସାଧାରଣ ପ୍ରଶାସନ, ଏବଂ ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ଭଳି ପ୍ରମୁଖ ବିଭାଗଗୁଡ଼ିକର ପ୍ରସଙ୍ଗ ଉପରେ ଆଲୋଚନା ହୋଇଥିଲା । ବିରୋଧୀ ଦଳର ସଦସ୍ୟମାନେ ପୂର୍ବରୁ ପ୍ରସ୍ତୁତ ହୋଇ ରହିଥିବାରୁ, ଅପରାହ୍ନ ଅଧିବେଶନରେ ସରକାରଙ୍କୁ ଘେରିବା ପାଇଁ ପୂରା ସମ୍ଭାବନା ରହିଛି । ବିଶେଷକରି, ଆଇନଶୃଙ୍ଖଳା ପରିସ୍ଥିତି, ରାଜ୍ୟରେ ସ୍ୱାସ୍ଥ୍ୟସେବା କ୍ଷେତ୍ରରେ ଥିବା ତ୍ରୁଟି ଏବଂ ପ୍ରଶାସନିକ ବ୍ୟବସ୍ଥାର ବିଫଳତାକୁ ନେଇ ବିରୋଧୀମାନେ ସରକାରଙ୍କୁ କଟୁ ସମାଲୋଚନା କରିବେ ବୋଲି ଆଶା କରାଯାଉଛି । ଫଳରେ ଗୃହରେ ତୀବ୍ର ବାକ୍-ବିତର୍କ ହେବାର ପରିବେଶ ସୃଷ୍ଟି ହେବ ।
ଅପରାହ୍ନ ଅଧିବେଶନରେ ବିଭିନ୍ନ ବିଭାଗର ଖର୍ଚ୍ଚ ଦାବି ଉପରେ ମଧ୍ୟ ବିସ୍ତୃତ ଆଲୋଚନା କରାଯିବ । ଏହି ଆଲୋଚନା ସମୟରେ ବିରୋଧୀମାନେ ସରକାରଙ୍କ ଖର୍ଚ୍ଚ ପରିଚାଳନା ନୀତି ଏବଂ ପାଣ୍ଠିର ବିନିଯୋଗକୁ ନେଇ ପ୍ରଶ୍ନ ଉଠାଇପାରନ୍ତି ।
ଆଜିର ଦିନ ଆଇନ ପ୍ରଣୟନ ଦୃଷ୍ଟିରୁ ମଧ୍ୟ ଅତ୍ୟନ୍ତ ମହତ୍ତ୍ୱପୂର୍ଣ୍ଣ । ରାଜସ୍ୱ ମନ୍ତ୍ରୀ ସୁରେଶ ପୂଜାରୀ ଗୃହରେ ‘ସରକାରୀ ଜମି ବନ୍ଦୋବସ୍ତ (ସଂଶୋଧନ) ନିୟମାବଳୀ-୨୦୨୫’ ଉପସ୍ଥାପନ କରିବାର କାର୍ଯ୍ୟକ୍ରମ ରହିଛି । ଏହି ନୂଆ ନିୟମାବଳୀ ରାଜ୍ୟର ଜମିଜମା ସଂକ୍ରାନ୍ତୀୟ ନିୟମାବଳୀରେ ବଡ଼ ଧରଣର ପରିବର୍ତ୍ତନ ଆଣିବାର ସମ୍ଭାବନା ରହିଛି ।
ସେହିପରି, ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂଦେଓ ଓଡ଼ିଶା କୃଷି ଶିଳ୍ପ ନିଗମ ଲିମିଟେଡ୍ର ୨୦୨୩-୨୪ ଆର୍ଥିକ ବର୍ଷର ବାର୍ଷିକ ରିପୋର୍ଟ ଗୃହରେ ଦାଖଲ କରିବେ । ଏହି ରିପୋର୍ଟରେ କୃଷି ଶିଳ୍ପ ନିଗମର ବର୍ଷକର କାର୍ଯ୍ୟଦକ୍ଷତା ଏବଂ ଆର୍ଥିକ ସ୍ଥିତି ସମ୍ପର୍କରେ ସୂଚନା ଦିଆଯିବ ।
ମୋଟାମୋଟି ଭାବେ, ଆଜିର ଅଧିବେଶନରେ ସରକାରୀ ବିଲ୍ ଏବଂ ରିପୋର୍ଟ ଉପସ୍ଥାପନ ସହିତ ବିରୋଧୀ ଦଳର ଆଭିମୁଖ୍ୟ ଉପରେ ସମସ୍ତଙ୍କ ନଜର ରହିଛି । ଏହା ଦିନର ଶେଷ ଭାଗରେ ଗୃହର ବାତାବରଣକୁ ଅଧିକ ଉତ୍ତେଜନାପୂର୍ଣ୍ଣ କରିବାର ସମ୍ଭାବନା ରହିଛି
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
