ଧର୍ମଶାଳା: ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଚାଲିଥିବା ୫ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ବର୍ତ୍ତମାନ ୧-୧ରେ ବରାବର ସ୍ଥିତିରେ ରହିଛି। ଆଜି (ରବିବାର, ଡିସେମ୍ବର ୧୪, ୨୦୨୫) ଧର୍ମଶାଳାସ୍ଥିତ ହିମାଚଳ ପ୍ରଦେଶ କ୍ରିକେଟ୍ ଆସୋସିଏସନ୍ (HPCA) ଷ୍ଟାଡିୟମରେ ସିରିଜର ତୃତୀୟ ତଥା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ମୁକାବିଲା ଖେଳାଯିବ। କଟକରେ ଜବରଦସ୍ତ ବିଜୟ ହାସଲ କରିବା ପରେ ଚଣ୍ଡିଗଡ଼ରେ ଦଳର ନୈରାଶ୍ୟଜନକ ପ୍ରଦର୍ଶନ ଯୋଗୁଁ ଭାରତୀୟ ଦଳ ଉପରେ ବିଜୟ ଧାରାକୁ ଫେରିବାର ପ୍ରବଳ ଚାପ ରହିଛି। ସିରିଜରେ ଅଗ୍ରଣୀ ନେବାକୁ ଉଭୟ ଦଳ ପୂରା ଦମ୍ରେ ଲଢ଼ିବାକୁ ପ୍ରସ୍ତୁତ ଅଛନ୍ତି, ତେଣୁ ଏହି ମ୍ୟାଚ୍ ରୋମାଞ୍ଚକର ହେବ ବୋଲି ଆଶା କରାଯାଉଛି।
ଚଣ୍ଡିଗଡ଼ ପରାଜୟ ଅନେକ ଦୃଷ୍ଟିରୁ ଭାରତୀୟ ଦଳ ପାଇଁ ଚିନ୍ତାର ବିଷୟ ପାଲଟିଛି। ସବୁଠାରୁ ବଡ଼ ଦୁର୍ବଳତା ହେଉଛି ଦଳର ଟପ୍ ଅର୍ଡର ବ୍ୟାଟିଂ ବିପର୍ଯ୍ୟୟ। ଅଧିନାୟକ ସୂର୍ଯ୍ୟକୁମାର ଯାଦବ ଏବଂ ଉପଅଧିନାୟକ ଶୁବମନ୍ ଗିଲ୍ ଲଗାତାର ଦୁଇଟି ମ୍ୟାଚରେ ବିଫଳ ହୋଇଛନ୍ତି। ଗିଲ୍ ଉଭୟ ମ୍ୟାଚରେ ପ୍ରଥମ ଓଭରରେ ଆଉଟ୍ ହୋଇ ପ୍ୟାଭିଲିଅନ ଫେରିଥିଲେ ଏବଂ ଅଧିନାୟକ ସୂର୍ଯ୍ୟକୁମାର ଯାଦବ ମଧ୍ୟ ବଡ଼ ସ୍କୋର କରିବାରେ ସଂଘର୍ଷ କରୁଛନ୍ତି। ତେଣୁ, ଆଜିର ମ୍ୟାଚ୍ରେ ତାଙ୍କ ବ୍ୟାଟ୍ରୁ ରନ୍ ବାହାରିବା ଦଳ ପାଇଁ ଅତ୍ୟନ୍ତ ଜରୁରୀ।
ଯୁବ ଓପନର୍ ଅଭିଷେକ ଶର୍ମା ମଧ୍ୟ ଆଶାଜନକ ଆରମ୍ଭ ଦେଇ ପାରି ନାହାନ୍ତି, ଯାହା ମ୍ୟାଚ୍ ଆରମ୍ଭରୁ ହିଁ ଦଳ ଉପରେ ଚାପ ସୃଷ୍ଟି କରୁଛି। ତେଣୁ ଧର୍ମଶାଳାର ଏହି ଗୁରୁତ୍ୱପୂର୍ଣ୍ଣ ମ୍ୟାଚରେ ଏହି ତିନିଜଣ ଖେଳାଳିଙ୍କ ପ୍ରଦର୍ଶନ ତଥା ଚୂଡ଼ାନ୍ତ ଏକାଦଶରେ ସେମାନଙ୍କ ଉପରେ କ’ଣ ନିଷ୍ପତ୍ତି ନିଆଯାଉଛି, ତାହା ଉପରେ ସମସ୍ତ କ୍ରିକେଟ୍ ପ୍ରେମୀଙ୍କ ନଜର ରହିବ।
ପ୍ରଥମ ମ୍ୟାଚରେ ବଡ଼ ବ୍ୟବଧାନରେ ହାରିବା ପରେ ଦକ୍ଷିଣ ଆଫ୍ରିକା ଦ୍ୱିତୀୟ ମ୍ୟାଚରେ ଦମଦାର ପ୍ରତ୍ୟାବର୍ତ୍ତନ କରି ଭାରତକୁ ୫୧ ରନରେ ପରାସ୍ତ କରିଥିଲା। କ୍ୱିଣ୍ଟନ୍ ଡିକକ୍ଙ୍କ ଦମଦାର ବ୍ୟାଟିଂ ଏବଂ ବୋଲରଙ୍କ ଶୃଙ୍ଖଳିତ ପ୍ରଦର୍ଶନ ଦଳକୁ ବିଜୟ ଦେବାରେ ସହାୟକ ହୋଇଥିଲା। ଭ୍ରମଣକାରୀ ଦଳ ସିରିଜରେ ସ୍ଥିତି ବରାବର କରିବା ପରେ ପୂର୍ଣ୍ଣ ଆତ୍ମବିଶ୍ୱାସର ସହିତ ଆଜିର ଲଢ଼େଇ ପାଇଁ ପୁରା ପ୍ରସ୍ତୁତ ରହିଛି ଏବଂ ସେମାନେ ଭାରତୀୟ ଦଳକୁ ପୁଣି ଥରେ ପରୀକ୍ଷାରେ ପକାଇବାକୁ ଅପେକ୍ଷା କରିଛନ୍ତି।
ଧର୍ମଶାଳା ପିଚ୍ ଦ୍ରୁତ ବୋଲରମାନଙ୍କୁ ଆରମ୍ଭରୁ ସାହାଯ୍ୟ କରିବ ବୋଲି ଆଶା କରାଯାଉଛି, ଯାହା ବ୍ୟାଟ୍ସମ୍ୟାନ୍ଙ୍କ ପାଇଁ ଏକ ଚ୍ୟାଲେଞ୍ଜ୍ ସୃଷ୍ଟି କରିପାରେ। ଧର୍ମଶାଳାରେ ସନ୍ଧ୍ୟାରେ କାକର ପଡ଼ିବାର ସମ୍ଭାବନା ଥିବାରୁ, ଟସ୍ ଜିତିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହେବ। ଟସ୍ ଜିତୁଥିବା ଦଳ ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇପାରେ। ପାଣିପାଗ ଥଣ୍ଡା ରହିବ ଏବଂ ବର୍ଷାର ସାମାନ୍ୟ ଆଶଙ୍କା ଥିଲେ ମଧ୍ୟ ଏକ ପୂର୍ଣ୍ଣ ମ୍ୟାଚ୍ ହେବ ବୋଲି ଆଶା କରାଯାଉଛି। ଭାରତକୁ ସିରିଜରେ ପୁନଃ ଅଗ୍ରଣୀ ନେବାକୁ ହେଲେ ବ୍ୟାଟିଂ ଏବଂ ବୋଲିଂ ଉଭୟ କ୍ଷେତ୍ରରେ ଉନ୍ନତ ପ୍ରଦର୍ଶନ କରିବାକୁ ପଡ଼ିବ।
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
