ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (BCCI) ସମସ୍ତ ଜାତୀୟ ଦଳର ଖେଳାଳିଙ୍କ ପାଇଁ ଏକ ଅତ୍ୟନ୍ତ କଡ଼ା ନିୟମ ଲାଗୁ କରିଛି। ଏହି ନିୟମ ଅନୁଯାୟୀ, ବର୍ତ୍ତମାନର ସମସ୍ତ ଭାରତୀୟ ଖେଳାଳି ଆସନ୍ତା ଡିସେମ୍ବର ୨୪ ତାରିଖରୁ ଆରମ୍ଭ ହେବାକୁ ଥିବା ପ୍ରତିଷ୍ଠିତ ଘରୋଇ ଦିନିକିଆ ଟୁର୍ଣ୍ଣାମେଣ୍ଟ ‘ବିଜୟ ହଜାରେ ଟ୍ରଫି’ର ଅତିକମରେ ଦୁଇଟି ମ୍ୟାଚ୍ ଖେଳିବାକୁ ବାଧ୍ୟତାମୂଳକ କରାଯାଇଛି। ବୋର୍ଡ ପକ୍ଷରୁ ଏହି ନିର୍ଦ୍ଦେଶନାମାକୁ ସବୁ ଖେଳାଳିଙ୍କ ନିକଟରେ ପହଞ୍ଚାଇ ଦିଆଯାଇଛି।
ବିସିସିଆଇ ଚାହୁଁଛି ଯେ ଦକ୍ଷିଣ ଆଫ୍ରିକା ବିପକ୍ଷ ଶେଷ ଟି-୨୦ ମ୍ୟାଚ୍ (ଡିସେମ୍ବର ୧୯, ଅହମଦାବାଦ) ଏବଂ ନ୍ୟୁଜିଲାଣ୍ଡ ବିପକ୍ଷ ପ୍ରଥମ ଦିନିକିଆ (ଜାନୁଆରୀ ୧୧, ୨୦୨୬) ମଧ୍ୟରେ ଥିବା ପ୍ରାୟ ତିନି ସପ୍ତାହର ବ୍ୟବଧାନକୁ ସମସ୍ତ ବରିଷ୍ଠ ଖେଳାଳି ଘରୋଇ କ୍ରିକେଟ୍ ଖେଳିବା ପାଇଁ ବ୍ୟବହାର କରନ୍ତୁ। ଏହା ଖେଳାଳିମାନଙ୍କର ମ୍ୟାଚ୍ ଫିଟନେସ୍ ବଜାୟ ରଖିବା ସହିତ ଘରୋଇ କ୍ରିକେଟ୍ ଢାଞ୍ଚାକୁ ମଜବୁତ କରିବ ବୋଲି ବୋର୍ଡ ଆଶା ରଖିଛି।
ଏହି ନୂଆ ନିର୍ଦ୍ଦେଶନାମା ଅଜିତ ଅଗରକରଙ୍କ ନେତୃତ୍ୱାଧୀନ ଜାତୀୟ ଚୟନ କମିଟି ଦ୍ୱାରା ସମସ୍ତ ଖେଳାଳିଙ୍କୁ ସ୍ପଷ୍ଟ ଭାବରେ ଜଣାଇ ଦିଆଯାଇଛି। ଏହି ନିୟମକୁ କାର୍ଯ୍ୟକାରୀ କରିବା ପଛରେ ବିସିସିଆଇର ମୁଖ୍ୟ ଉଦ୍ଦେଶ୍ୟ ହେଉଛି ଖେଳାଳିମାନେ ଟେଷ୍ଟ କିମ୍ବା ସୀମିତ ଓଭର ଫର୍ମାଟରେ ଖେଳୁ ନଥିବା ସମୟରେ ମଧ୍ୟ କ୍ରିକେଟ୍ ଠାରୁ ଦୂରେଇ ନ ରହି ନିଜ ରାଜ୍ୟ ଦଳ ପାଇଁ ଖେଳିବା ଉଚିତ। ଏହି ନିୟମ ବଡ଼ ଖେଳାଳିମାନଙ୍କ ପାଇଁ ମଧ୍ୟ ଲାଗୁ ହେବ, ଯେଉଁମାନେ ପୂର୍ବରୁ ଅନ୍ତର୍ଜାତୀୟ ପ୍ରତିବଦ୍ଧତା ଦର୍ଶାଇ ଘରୋଇ ମ୍ୟାଚ୍ରୁ ଦୂରେଇ ରହୁଥିଲେ।
ସୂଚନାଯୋଗ୍ୟ ଯେ, ବରିଷ୍ଠ ଖେଳାଳିମାନଙ୍କୁ ଘରୋଇ କ୍ରିକେଟ୍ ଖେଳିବା ବାଧ୍ୟତାମୂଳକ କରିବା ପାଇଁ ବିସିସିଆଇର ଏହି ନିଷ୍ପତ୍ତି ପୂର୍ବରୁ କରାଯାଇଥିବା ସମୀକ୍ଷାର ଅଂଶବିଶେଷ, ଯେଉଁଥିରେ ଘରୋଇ କ୍ରିକେଟ୍କୁ ଅଧିକ ଗୁରୁତ୍ୱ ଦେବାକୁ ପରାମର୍ଶ ଦିଆଯାଇଥିଲା। ବିଜୟ ହଜାରେ ଟ୍ରଫିର ୬ ରାଉଣ୍ଡ ଖେଳାଯିବାକୁ ଥିବାବେଳେ କେଉଁ ଦୁଇଟି ମ୍ୟାଚ୍ ଖେଳାଳିମାନେ ଖେଳିବେ, ତାହା ସେମାନଙ୍କ ରାଜ୍ୟ ଆସୋସିଏସନ୍ ସହିତ ଆଲୋଚନା କରି ସ୍ଥିର କରିପାରିବେ। ତେବେ, ଅସୁସ୍ଥ କିମ୍ବା ଆହତ ଥିବା ଖେଳାଳିଙ୍କୁ ଜାତୀୟ କ୍ରିକେଟ୍ ଏକାଡେମୀ (NCA) ଦ୍ୱାରା ଅନୁମତି ମିଳିଲେ ହିଁ ଏହି ନିୟମରୁ ବାଦ୍ ଦିଆଯାଇପାରେ
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
