ଭୁବନେଶ୍ୱର: ସାରା ରାଜ୍ୟରେ ଏବେ ଶୀତ ସାଙ୍ଗକୁ ଘନ କୁହୁଡ଼ିର ପ୍ରାଦୁର୍ଭାବ ଜାରି ରହିଛି। ବିଶେଷକରି କୋରାପୁଟ ଜିଲ୍ଲାରେ ଶୀତର ଲହରୀ ଅସହ୍ୟ ହୋଇପଡ଼ିଛି। ଚଳିତ ବର୍ଷ ପ୍ରଥମ ଥର ପାଇଁ ରାଜ୍ୟର ସର୍ବନିମ୍ନ ତାପମାତ୍ରା ଦାମନଯୋଡ଼ିଠାରେ ୨.୯ ଡିଗ୍ରୀ ସେଲସିୟସ ରେକର୍ଡ କରାଯାଇଛି। ସେହିପରି ଲମତାପୁଟରେ ୪.୩ ଡିଗ୍ରୀ, ନନ୍ଦପୁରରେ ୪.୬ ଡିଗ୍ରୀ ଏବଂ ସିମିଳିଗୁଡ଼ା ଅଞ୍ଚଳରେ ରାତିର ତାପମାତ୍ରା ୫.୫ ଡିଗ୍ରୀ ରହିଥିବା ଜଣାପଡ଼ିଛି। ସୂଚନାଯୋଗ୍ୟ ଯେ, ରାଜ୍ୟର ପ୍ରାୟ ୧୦ଟି ସହରର ତାପମାତ୍ରା ଏବେ ୧୦ ଡିଗ୍ରୀ ତଳକୁ ଖସି ଆସିଥିବା ବେଳେ ଆଗାମୀ ଏକ ସପ୍ତାହ ପର୍ଯ୍ୟନ୍ତ ଶୀତର ଏହି ପ୍ରଭାବରେ କୌଣସି ପରିବର୍ତ୍ତନ ହେବାର ସମ୍ଭାବନା ନାହିଁ।
ଅପରପକ୍ଷରେ, ଘନ କୁହୁଡ଼ି ଯୋଗୁଁ ବିଭିନ୍ନ ସ୍ଥାନରେ ସାଧାରଣ ଜନଜୀବନ ଗୁରୁତର ଭାବେ ପ୍ରଭାବିତ ହୋଇଛି। କାକଟପୁର ଅଞ୍ଚଳରେ କୁହୁଡ଼ିର ମୋଟା ଆସ୍ତରଣ ଯୋଗୁଁ ଦୃଶ୍ୟମାନ ଦୂରତା ମାତ୍ର ୧୦ ମିଟରକୁ କମି ଯାଇଛି, ଯାହାଫଳରେ ଗାଡ଼ି ଚାଳକମାନେ ହେଡ୍ଲାଇଟ୍ ଜଳାଇ ଯାତାୟାତ କରୁଛନ୍ତି। ଶୀତୁଆ ସକାଳରୁ ଟ୍ୟୁସନ୍ ଯାଉଥିବା ସ୍କୁଲ୍ ଛାତ୍ରଛାତ୍ରୀମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏହି ପ୍ରବଳ ଜାଡ଼ରୁ ରକ୍ଷା ପାଇବା ପାଇଁ ଲୋକମାନେ ଛକ ବଜାରରେ ଚା’ ଦୋକାନରେ ଭିଡ଼ ଜମାଇବା ସହ ନିଆଁ ପୁଇଁ ଆଶ୍ୱସ୍ତି ଲାଭ କରୁଥିବା ଦେଖିବାକୁ ମିଳୁଛି।
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
