ଭୁବନେଶ୍ବର: ଓଡ଼ିଶା ଦୁର୍ନୀତି ନିବାରଣ ବିଭାଗ (ଭିଜିଲାନ୍ସ) ଦ୍ୱାରା ରାହାମା ରେଞ୍ଜର ରାଜେନ୍ଦ୍ର ସାମନ୍ତରାୟଙ୍କୁ ଗିରଫ କରାଯାଇଛି। ଗତକାଲି ତାଙ୍କର ଚାରୋଟି ବିଭିନ୍ନ ସ୍ଥାନରେ ଚଢ଼ାଉ କରାଯିବା ପରେ ଆଜି ତାଙ୍କୁ କଟକର ସ୍ୱତନ୍ତ୍ର ଭିଜିଲାନ୍ସ କୋର୍ଟରେ ହାଜର କରାଯିବ। ରେଞ୍ଜର ବାବୁଙ୍କ ବିପୁଳ ସମ୍ପତ୍ତି ଦେଖି ଭିଜିଲାନ୍ସ ଅଧିକାରୀମାନେ ମଧ୍ୟ ଆଶ୍ଚର୍ଯ୍ୟ ହୋଇଯାଇଛନ୍ତି।
ଭିଜିଲାନ୍ସ ସୂଚନା ଅନୁଯାୟୀ, ଚଢ଼ାଉ ସମୟରେ ରାଜେନ୍ଦ୍ରଙ୍କର ପ୍ରାୟ ୩ କୋଟି ଟଙ୍କାରୁ ଅଧିକ ସ୍ଥାବର ଓ ଅସ୍ଥାବର ସମ୍ପତ୍ତି ଠାବ ହୋଇଛି:
• ଜଗତସିଂହପୁର ସଦର ଥାନା ଅନ୍ତର୍ଗତ ଚାଟରା ଠାରେ ଏକ ୩ ମହଲା ବିଶିଷ୍ଟ ବିଳାସପୂର୍ଣ୍ଣ କୋଠା (୫୫୦୦ ବର୍ଗଫୁଟ) ଏବଂ ତାଙ୍କ ପୈତୃକ ଗ୍ରାମ ସାମନ୍ତରାୟପୁରରେ ଏକ ୨ ମହଲା କୋଠା ଠାବ ହୋଇଛି।
• ଜଗତସିଂହପୁର ସହରରେ ୨ଟି ଏବଂ କଟକ ସହର ଉପକଣ୍ଠରେ ୩ଟି, ଏହିପରି ମୋଟ ୫ଟି ଦାମୀ ପ୍ଲଟ୍ ରହିଥିବା ଜଣାପଡ଼ିଛି।
• ତାଙ୍କ ଘରୁ ପ୍ରାୟ ୨୫୦ ଗ୍ରାମ ସୁନା ଅଳଙ୍କାର ଏବଂ ୩ ଲକ୍ଷ ୬୯ ହଜାର ଟଙ୍କା ନଗଦ ଜବତ ହୋଇଛି।
• ବ୍ୟାଙ୍କ ଓ ପୋଷ୍ଟାଲରେ ତାଙ୍କର ପ୍ରାୟ ୮୦ ଲକ୍ଷ ୬୮ ହଜାର ଟଙ୍କାର ଜମା ରାଶି ଥିବା ତଥ୍ୟ ହସ୍ତଗତ ହୋଇଛି।
• ଏହା ସହ ଏକ ବୋଲେରୋ ଗାଡ଼ି ଓ ଦୁଇଟି ବାଇକ୍ ମଧ୍ୟ ଜବତ କରାଯାଇଛି।
ଗତ ଶନିବାର ସକାଳୁ ଭିଜିଲାନ୍ସର ଏକ ସ୍ୱତନ୍ତ୍ର ଟିମ୍ ଏକକାଳୀନ ୪ଟି ସ୍ଥାନରେ ଚଢ଼ାଉ କରିଥିଲେ। ଏଥିରେ ୨ ଜଣ ଅତିରିକ୍ତ ଏସପି, ୫ ଜଣ ଡିଏସପି ଏବଂ ୮ ଜଣ ଇନ୍ସପେକ୍ଟର ସାମିଲ ଥିଲେ। ତାଙ୍କର ସରକାରୀ କାର୍ଯ୍ୟାଳୟ, ଚାଟରା ସ୍ଥିତ ବାସଭବନ ଓ ପୈତୃକ ଘରେ ଏହି ଖୋଜତାଲାସ ଜାରି ରହିଥିଲା।
ରାଜେନ୍ଦ୍ର ସାମନ୍ତରାୟ ୨୬ ନଭେମ୍ବର ୧୯୮୫ ମସିହାରେ ମାତ୍ର ୧୫୦୦ ଟଙ୍କା ମାସିକ ଦରମାରେ ଜଣେ ଫରେଷ୍ଟର ଭାବେ ଚାକିରି ଆରମ୍ଭ କରିଥିଲେ। ଦୀର୍ଘ ୪ ଦଶନ୍ଧି ଧରି ସେ ଜଗତସିଂହପୁର ଓ କେନ୍ଦ୍ରାପଡ଼ା ଜିଲ୍ଲାରେ କାର୍ଯ୍ୟ କରିଛନ୍ତି। ୧୫ ସେପ୍ଟେମ୍ବର ୨୦୨୧ରେ ସେ ଡେପୁଟି ରେଞ୍ଜର ଏବଂ ୩୧ ଅଗଷ୍ଟ ୨୦୨୩ରେ ରେଞ୍ଜର ପଦବୀକୁ ପଦୋନ୍ନତି ପାଇଥିଲେ।
ତେବେ ତାଙ୍କ ବିରୋଧରେ କାର୍ଯ୍ୟକ୍ଷେତ୍ରରେ ଦୁର୍ନୀତି କରି ବିପୁଳ ସମ୍ପତ୍ତି ଠୁଳ କରିଥିବା ନେଇ ବାରମ୍ବାର ଅଭିଯୋଗ ହେଉଥିଲା। ଜବତ ହୋଇଥିବା ସମ୍ପତ୍ତିର ମୂଲ୍ୟ ତାଙ୍କର ଜ୍ଞାତ ଆୟ ଠାରୁ ଯଥେଷ୍ଟ ଅଧିକ ହୋଇଥିବା ବେଳେ, ଏହି ସମ୍ପତ୍ତି କେଉଁଠୁ ଆସିଲା ସେ ନେଇ ରାଜେନ୍ଦ୍ର କୌଣସି ସନ୍ତୋଷଜନକ ଉତ୍ତର ଦେଇପାରି ନଥିଲେ। ଫଳରେ ଭିଜିଲାନ୍ସ ତାଙ୍କୁ ଗିରଫ କରିଛି।
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
