ବାଂଲାଦେଶ: ବାଂଲାଦେଶର ମୈମନସିଂ ଜିଲ୍ଲାରୁ ଏକ ଅତ୍ୟନ୍ତ ହୃଦୟବିଦାରକ ଘଟଣା ସାମ୍ନାକୁ ଆସିଛି। ଜଣେ ୨୭ ବର୍ଷୀୟ ହିନ୍ଦୁ ଯୁବକ, ଦୀପୁ ଚନ୍ଦ୍ର ଦାସଙ୍କୁ ଈଶ୍ୱରନିନ୍ଦା (Blasphemy) ର ମିଥ୍ୟା ଅଭିଯୋଗରେ ଉତ୍ତ୍ୟକ୍ତ ଜନତା ଅତି ନିର୍ମମ ଭାବେ ହତ୍ୟା କରିଛନ୍ତି। ଏହି ଘଟଣାରେ ସବୁଠାରୁ ଭୟଙ୍କର ଦିଗ ହେଉଛି ଯେ, ଯେଉଁ କାରଖାନାରେ ସେ କାମ କରୁଥିଲେ, ସେହି କାରଖାନାର କର୍ତ୍ତୃପକ୍ଷ ହିଁ ତାଙ୍କୁ ସୁରକ୍ଷା ଦେବା ପରିବର୍ତ୍ତେ ମୃତ୍ୟୁ ମୁଖକୁ ଠେଲି ଦେଇଥିଲେ।
କ’ଣ ଥିଲା ପୂରା ଘଟଣା?
ଗୁରୁବାର (୧୮ ଡିସେମ୍ବର) ଦିନ ଭାଲୁକା ଅଞ୍ଚଳରେ ଥିବା ଏକ ପୋଷାକ କାରଖାନାରେ ଦୀପୁଙ୍କ ବିରୋଧରେ ଧର୍ମକୁ ଅପମାନ କରିଥିବା ନେଇ ଗୁଜବ ପ୍ରଚାର ହୋଇଥିଲା। ତଦନ୍ତରୁ ଜଣାପଡ଼ିଛି ଯେ, ଅପରାହ୍ନ ପ୍ରାୟ ୪ଟା ସମୟରେ କାରଖାନା ଭିତରେ ହିଂସା ଆରମ୍ଭ ହୋଇଥିଲା। କାରଖାନାର ଫ୍ଲୋର୍ ସୁପରଭାଇଜର ଏବଂ କ୍ୱାଲିଟି ମ୍ୟାନେଜର ଦୀପୁଙ୍କୁ ପୋଲିସକୁ ହସ୍ତାନ୍ତର କରିବା ପରିବର୍ତ୍ତେ ପ୍ରଥମେ ତାଙ୍କୁ ଜବରଦସ୍ତି ଇସ୍ତଫା ଦେବାକୁ ବାଧ୍ୟ କରିଥିଲେ ଏବଂ ପରେ କାରଖାନା ବାହାରେ ଜମା ହୋଇଥିବା ଉଗ୍ର ଇସଲାମବାଦୀ ଜନତାଙ୍କ ହାତରେ ଟେକି ଦେଇଥିଲେ।
ରାତି ପ୍ରାୟ ୯ଟା ବେଳକୁ ପରିସ୍ଥିତି ଅତି ଭୟଙ୍କର ରୂପ ଧାରଣ କରିଥିଲା। ଜନତା କାରଖାନାର ସୁରକ୍ଷା କକ୍ଷ ଭାଙ୍ଗି ଦୀପୁଙ୍କୁ ଟାଣି ବାହାରକୁ ଆଣିଥିଲେ ଏବଂ ତାଙ୍କୁ ବେଦମ ପିଟିଥିଲେ। ପରେ ତାଙ୍କୁ ହତ୍ୟା କରି ଶରୀରକୁ ଢାକା-ମୈମନସିଂ ରାଜପଥରେ ଝୁଲାଇ ଦିଆଯାଇଥିଲା ଏବଂ ପରେ ନିଆଁ ଲଗାଇ ଦିଆଯାଇଥିଲା।
ବାଂଲାଦେଶର ରାପିଡ୍ ଆକ୍ସନ୍ ବାଟାଲିଅନ୍ (RAB) ଏବଂ ସ୍ଥାନୀୟ ପୋଲିସ ପକ୍ଷରୁ କରାଯାଇଥିବା ତଦନ୍ତରୁ କିଛି ଚଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି:
- ଅଧିକାରୀଙ୍କ ଅନୁଯାୟୀ, ଦୀପୁଙ୍କ ବିରୋଧରେ ଈଶ୍ୱରନିନ୍ଦାର କୌଣସି ଠୋସ୍ ପ୍ରମାଣ ମିଳିନାହିଁ।
- ତଦନ୍ତକାରୀଙ୍କ କହିବା କଥା ଯେ, ଏହା କୌଣସି ହଠାତ୍ ଘଟିଥିବା ହିଂସା ନୁହେଁ, ବରଂ ଏକ ସୁଚିନ୍ତିତ ଯୋଜନା ଥିଲା। କାରଖାନାରୁ ବହିଷ୍କାର ଓ ଜନତାଙ୍କୁ ହସ୍ତାନ୍ତର କରିବା ଏହି ଷଡ଼ଯନ୍ତ୍ରର ଅଂଶ ବୋଲି ସନ୍ଦେହ କରାଯାଉଛି।
- ସିସିଟିଭି ଫୁଟେଜ୍ ଆଧାରରେ ବର୍ତ୍ତମାନ ସୁଦ୍ଧା ୧୨ ଜଣଙ୍କୁ ଗିରଫ କରାଯାଇଛି, ଯେଉଁଥିରେ କାରଖାନାର ଫ୍ଲୋର୍ ମ୍ୟାନେଜର ଆଲମଗୀର ହୋସେନ ଏବଂ କ୍ୱାଲିଟି ମ୍ୟାନେଜର ମିରାଜ ହୋସେନ ମଧ୍ୟ ସାମିଲ ଅଛନ୍ତି।
ପରିବାରରେ ଶୋକର ଛାୟା:
ଦୀପୁଙ୍କ ପରିବାରରେ ତାଙ୍କ ପତ୍ନୀ ଏବଂ ଏକ ଦେଢ଼ ବର୍ଷର ଛୋଟ ଶିଶୁ ଅଛନ୍ତି। ଦୀପୁଙ୍କ ଭାଇ ଅପୁ ଚନ୍ଦ୍ର ଦାସ ଏହି ଘଟଣାକୁ ନେଇ ଗଭୀର ଦୁଃଖ ପ୍ରକାଶ କରିବା ସହ ଦୋଷୀଙ୍କୁ କଠୋର ଦଣ୍ଡ ଦେବାକୁ ଦାବି କରିଛନ୍ତି। ଅନ୍ୟପଟେ ଭାରତ ସରକାର ଏବଂ ଆନ୍ତର୍ଜାତୀୟ ମାନବାଧିକାର ସଂଗଠନଗୁଡ଼ିକ ଏହି ଘଟଣାକୁ କଡ଼ା ନିନ୍ଦା କରିବା ସହ ବାଂଲାଦେଶରେ ସଂଖ୍ୟାଲଘୁଙ୍କ ସୁରକ୍ଷା ନେଇ ଚିନ୍ତା ପ୍ରକଟ କରିଛନ୍ତି।
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
