ଭୁବନେଶ୍ୱର: ଭାଇ ପାଇଁ ଜୀବନ ଲାଗିଲା ବାଜି। ଯକୃତ ଦେଇ ଭାଇର ଜୀବନ ବଞ୍ଚାଇଲା ଭାଇ। ଜୀବନ ଯୁଦ୍ଧରେ ସଂଗ୍ରାମ କରୁଥିବା ଜଣେ ବଡ଼ ଭାଇର ଜୀବନ ବଞ୍ଚାଇଛି ସାନ ଭାଇ। ଏହା ସମ୍ଭବ ହୋଇଛି ଭୁବନେଶ୍ୱର AIIMS ରେ । ସଫଳତାର ସହ ପ୍ରଥମ ଯକୃତ ପ୍ରତିରୋପଣ (Liver Transplant) ହୋଇଛି । AIIMS ଭୁବନେଶ୍ୱରରେ ଏହାର ପ୍ରଥମ ଯକୃତ ପ୍ରତିରୋପଣ । ଏଥି ସହ ସ୍ୱାସ୍ଥ୍ୟସେବା କ୍ଷେତ୍ରରେ ଏକ ଐତିହାସିକ ମାଇଲଖୁଣ୍ଟ ସ୍ଥାପନ କରିଛି ଭୁବନେଶ୍ଵର AIIMS ।
ଯକୃତ ପ୍ରତିରୋପଣ ଗ୍ରହଣକାରୀ ବ୍ୟକ୍ତିଜଣକ ଓଡ଼ିଶାର ପୁରୀ ଜିଲ୍ଲା ପିପିଲି ଅଞ୍ଚଳର ଜଣେ ୩୭ ବର୍ଷୀୟ ବ୍ୟକ୍ତି । ଦାତା ଜଣକ ହେଉଛନ୍ତି ଜଣେ ୩୦ ବର୍ଷୀୟ ଯୁବକ, ଯିଏ କି ଗ୍ରହଣକାରୀଙ୍କ ନିଜ ଭାଇ । ସେ କୌଣସି ଆର୍ଥିକ ବା ଭୌତିକ ପ୍ରତିଦାନ ବିନା କେବଳ ଭଲପାଇବା ଏବଂ ସ୍ନେହରେ ନିଜ ଯକୃତର ଏକ ଅଂଶ ସ୍ୱେଚ୍ଛାକୃତ ଭାବେ ଦାନ କରିଛନ୍ତି । ସାନ ଭାଇ ଅଭିଜିତ ଦଳେଇ ବଡ଼ଭାଇ ଅବିନାଶ ଦଳେଇଙ୍କୁ ନିଜର ଲିଭର ଦାନ କରି ଉଦାହରଣ ସୃଷ୍ଟି କରିଛନ୍ତି । ଯକୃତ ପ୍ରତିରୋପଣ ଗ୍ରହଣକାରୀ ରୋଗୀ ବର୍ତ୍ତମାନ ଭଲ ଅଛନ୍ତି, ଏବଂ ନିକଟ ସମ୍ପର୍କୀୟ ଦାତା, ରୋଗୀଙ୍କ ସାନଭାଇ, ମଧ୍ୟ ସୁସ୍ଥ ହୋଇ ଏହି ସପ୍ତାହରେ ଡିସଚାର୍ଜ ହୋଇଛନ୍ତି ।
AIIMS ଭୁବନେଶ୍ୱରରେ ଯକୃତ ପ୍ରତିରୋପଣ କାର୍ଯ୍ୟକ୍ରମ (Liver Transplant Programme) ୨୦୨୩ ମସିହାରେ ପରିକଳ୍ପନା କରାଯାଇଥିଲା । ଅକ୍ଟୋବର ୨୦୨୩ରେ କାର୍ଯ୍ୟକ୍ରମ ଆରମ୍ଭ କରିବା ପାଇଁ ସରକାରୀ ଅନୁମତି ପତ୍ର ପାଇଥିଲା। ପ୍ରତିରୋପଣ ସେବାକୁ ଅଧିକ ସୁଦୃଢ଼ କରିବା ପାଇଁ, ନଭେମ୍ବର ୨୦୨୫ରୁ ଏକ ୧୦ ଶଯ୍ୟା ବିଶିଷ୍ଟ ଅତ୍ୟାଧୁନିକ ପ୍ରତିରୋପଣ ଗଭୀର ଚିକିତ୍ସା କକ୍ଷ (ICU) ସମ୍ପୂର୍ଣ୍ଣ ରୂପେ କାର୍ଯ୍ୟକାରୀ ହୋଇଛି । ଏହି କାର୍ଯ୍ୟକ୍ରମ କାର୍ଯ୍ୟନିର୍ବାହୀ ନିର୍ଦ୍ଦେଶକ ପ୍ରଫେସର (ଡକ୍ଟର) ଆଶୁତୋଷ ବିଶ୍ୱାସଙ୍କ ଦୂରଦୃଷ୍ଟି ସମ୍ପନ୍ନ ନେତୃତ୍ୱ ଏବଂ ମେଡିକାଲ ସୁପରିଟେଣ୍ଡେଣ୍ଟ ପ୍ରଫେସର (ଡକ୍ଟର) ଦିଲ୍ଲୀପ କୁମାର ପରିଡ଼ାଙ୍କ ମାର୍ଗଦର୍ଶନରେ ଅଗ୍ରଗତି କରିଛି । ଉତ୍କର୍ଷତା ଏବଂ ସ୍ଥାୟୀ କ୍ଷମତା ବୃଦ୍ଧି ସୁନିଶ୍ଚିତ କରିବା ପାଇଁ, AIIMS ଭୁବନେଶ୍ୱର ଯକୃତ ଏବଂ ପିତ୍ତ ନଳୀ ରୋଗ ପାଇଁ ସମର୍ପିତ ଦେଶର ଅଗ୍ରଣୀ ସାର୍ବଜନୀନ କ୍ଷେତ୍ର ଅନୁଷ୍ଠାନ Institute of Liver and Biliary Sciences (ILBS), ନୂଆଦିଲ୍ଲୀ ସହିତ ଏକ ବୁଝାମଣା ପତ୍ର (MoU) ସ୍ୱାକ୍ଷର କରିଛି ।
ଯକୃତ ପ୍ରତିରୋପଣ ଅସ୍ତ୍ରୋପଚାର ସର୍ଜିକାଲ୍ ଗ୍ୟାଷ୍ଟ୍ରୋ ଏଣ୍ଟେରୋଲୋଜି ବିଭାଗ ଦ୍ୱାରା ସମ୍ପାଦିତ ହୋଇଥିଲା, ନେତୃତ୍ୱ ନେଇଥିଲେ ଡକ୍ଟର ବ୍ରହ୍ମଦତ୍ତ ପଟ୍ଟନାୟକ (ମୁଖ୍ୟ – ଜିଆଇ ଏବଂ ଲିଭର ଟ୍ରାନ୍ସପ୍ଲାଣ୍ଟ ସର୍ଜରୀ), ତାଙ୍କ ସହ ଡକ୍ଟର ତନ୍ମୟ ଦତ୍ତ ଏବଂ ଡକ୍ଟର ସୁନିତା ଗୁପ୍ତା ଥିଲେ । ଏହା ILBS, ନୂଆଦିଲ୍ଲୀର ଲିଭର ଟ୍ରାନ୍ସପ୍ଲାଣ୍ଟ ସର୍ଜରୀ ମୁଖ୍ୟ ପ୍ରଫେସର ଡକ୍ଟର ବିନୟେନ୍ଦ୍ର ପାମେଚା ଏବଂ ତାଙ୍କ ବିଶେଷଜ୍ଞ ଦଳଙ୍କ ମାର୍ଗଦର୍ଶନରେ ସମ୍ପନ୍ନ ହୋଇଥିଲା । ଜଣେ ପ୍ରଶିକ୍ଷିତ ଶିଶୁ ଯକୃତ ପ୍ରତିରୋପଣ ସର୍ଜନ ଡକ୍ଟର ସୁବ୍ରତ କୁମାର ସାହୁ ମଧ୍ୟ ସର୍ଜିକାଲ୍ ଟିମ୍ର ଜଣେ ପ୍ରମୁଖ ସଦସ୍ୟ ଥିଲେ । AIIMS ଭୁବନେଶ୍ୱରରେ ଯକୃତ ପ୍ରତିରୋପଣ ରୋଗୀଙ୍କ ଅପେକ୍ଷା ତାଲିକା କ୍ରମାଗତ ଭାବେ ବୃଦ୍ଧି ପାଉଛି, ଯେଉଁଥିରେ କେବଳ ଓଡ଼ିଶା ନୁହେଁ ବରଂ ପଡ଼ୋଶୀ ରାଜ୍ୟର ରୋଗୀମାନେ ଆସୁଛନ୍ତି। ଏହି କାର୍ଯ୍ୟକ୍ରମ ଏକ ସମର୍ପିତ ବହୁମୁଖୀ ଦଳ ଦ୍ୱାରା ସମର୍ଥିତ, ଯେଉଁଥିରେ ଯକୃତ ପ୍ରତିରୋପଣ ଏବଂ ଜିଆଇ ସର୍ଜରୀ ବିଶେଷଜ୍ଞ,ଗ୍ୟାଷ୍ଟ୍ରୋ ଏଣ୍ଟେରୋଲୋଜିଷ୍ଟ, ଶିଶୁ ସର୍ଜନ, ପ୍ରତିରୋପଣ ସମନ୍ୱୟକାରୀ, ପରାମର୍ଶଦାତା, ପୁଷ୍ଟିସାର ବିଶେଷଜ୍ଞ, ଆନାସ୍ଥେସିଓଲୋଜିଷ୍ଟ, ରେଡିଓଲୋଜିଷ୍ଟ, ରକ୍ତ ଭଣ୍ଡାର ବିଶେଷଜ୍ଞ ଏବଂ କ୍ରିଟିକାଲ୍ କେୟାର୍ ବିଶେଷଜ୍ଞ ଅଛନ୍ତି ଯାହା ଅଞ୍ଚଳବାସୀଙ୍କୁ ବିଶ୍ୱସ୍ତରୀୟ, ବ୍ୟାପକ ସ୍ୱାସ୍ଥ୍ୟସେବା ଯୋଗାଇବା ପାଇଁ AIIMS ଭୁବନେଶ୍ୱରର ଅତୁଟ ପ୍ରତିବଦ୍ଧତାକୁ ଦର୍ଶାଉଛି।
Author: Hindustan Tales Odisha
Hindustan Tales Odisha brings you the latest news, Breaking News from Odisha, India and around the world.Stay informed with breaking News,24*7 Updates.
