ଆମେରିକାର ରାଜନୈତିକ ବାତାବରଣ ବର୍ତ୍ତମାନ ପୂରା ଉତ୍ତେଜିତ ରହିଛି, କାରଣ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବିରୋଧରେ ଦେଶବ୍ୟାପୀ ଆନ୍ଦୋଳନ ଏକ ବିଶାଳ ରୂପ ନେଇଛି। ରାଜଧାନୀ ୱାଶିଂଟନ ଡିସିର ରାସ୍ତା ଉପରେ ହଜାର ହଜାର ଆନ୍ଦୋଳନକାରୀ ଓହ୍ଲାଇଛନ୍ତି ଏବଂ ଟ୍ରମ୍ପଙ୍କୁ ତୁରନ୍ତ ରାଷ୍ଟ୍ରପତି ଗାଦିରୁ ହଟାଇବା ପାଇଁ ଜୋରଦାର ଦାବି କରିଛନ୍ତି।
ଗତ କିଛି ମାସ ଧରି ଧୀରେ ଧୀରେ ଚାଲିଥିବା ଏହି ଟ୍ରମ୍ପ ବିରୋଧୀ ପ୍ରଦର୍ଶନ ଏବେ ବଡ଼ ଆକାର ଧାରଣ କରିଛି। ଆନ୍ଦୋଳନକାରୀମାନେ ନିର୍ଦ୍ଦିଷ୍ଟ ଭାବେ ମହାଭିଯୋଗ ପ୍ରସ୍ତାବ (Impeachment) ମାଧ୍ୟମରେ ଟ୍ରମ୍ପଙ୍କୁ ହଟାଇବା ପାଇଁ ଦାବି କରୁଛନ୍ତି। ସେମାନଙ୍କ ଅଭିଯୋଗ ଯେ ଟ୍ରମ୍ପ କ୍ଷମତାକୁ ଆସିବା ପରଠାରୁ ତାଙ୍କ ନୀତି ଓ ନିଷ୍ପତ୍ତିଗୁଡ଼ିକ ଦେଶ ପାଇଁ କ୍ଷତିକାରକ ହୋଇଛି, ଯାହା ବିଭିନ୍ନ ସ୍ତରରେ ତୀବ୍ର ସମାଲୋଚନାର ଶିକାର ହୋଇଛି। ଏହା ହିଁ ଏହି ଆନ୍ଦୋଳନର ମୁଖ୍ୟ କାରଣ।
ଏହି ପ୍ରଦର୍ଶନ ‘ରିମୁଭ୍ ଦି ରିଜାଇମ୍’ (Remove the Regime) ନାମକ ବ୍ୟାନର ତଳେ ହେଉଛି ଏବଂ ଏଥିରେ କେବଳ ସାଧାରଣ ଲୋକ ନୁହଁନ୍ତି, ବିଭିନ୍ନ କର୍ମୀ, କଳାକାର ଏବଂ ବହୁ ରାଜନୈତିକ ନେତା ମଧ୍ୟ ସାମିଲ ହୋଇଛନ୍ତି। ଆମେରିକା ପ୍ରତିନିଧି ସଭା ସଦସ୍ୟ ଅଲ ଗ୍ରୀନ ଏବଂ ପୂର୍ବତନ ପୋଲିସ ଅଧିକାରୀ ମାଇକେଲ ଫାନୋନ ଏହି ବଡ଼ ଆନ୍ଦୋଳନର ନେତୃତ୍ୱ ନେଉଛନ୍ତି।
ସାରା ଦେଶର ଦୃଷ୍ଟି ବର୍ତ୍ତମାନ ଏହି ଆନ୍ଦୋଳନ ଉପରେ ରହିଛି, କାରଣ ଏହା ଆମେରିକାର ରାଜନୈତିକ ଭବିଷ୍ୟତ ଉପରେ ଗଭୀର ପ୍ରଭାବ ପକାଇବାର ସମ୍ଭାବନା ରହିଛି।
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
