ନୂଆଦିଲ୍ଲୀ: ଦିଲ୍ଲୀ ବିଶ୍ୱବିଦ୍ୟାଳୟ (DU) ଅଧୀନରେ ଥିବା ରାମଜସ୍ କଲେଜ ଏବଂ ଦେଶବନ୍ଧୁ କଲେଜକୁ ବୁଧବାର ଭୋର୍ ସମୟରେ ବୋମା ଧମକପୂର୍ଣ୍ଣ ଇ-ମେଲ୍ ଆସିବା ପରେ କ୍ୟାମ୍ପସ୍ଗୁଡ଼ିକୁ ତୁରନ୍ତ ଖାଲି କରାଯାଇଥିଲା। ତେବେ ଉଭୟ ଘଟଣା ଯାଞ୍ଚ ପରେ ହୋକ୍ସ (ମିଥ୍ୟା ଧମକ) ଥିବା ପୋଲିସ୍ ସ୍ପଷ୍ଟ କରିଛି।
ପୋଲିସ୍ ସୂଚନା ଅନୁଯାୟୀ, କଲେଜଗୁଡ଼ିକର ଅଫିସିଆଲ୍ ଇ-ମେଲ୍ ଆଇଡିକୁ ବୁଧବାର ଭୋର୍ ପ୍ରାୟ ୨ଟା ସମୟରେ ଏହି ଧମକ ମିଳିଥିଲା। ରାମଜସ୍ କଲେଜର ପ୍ରଶାସନ ସକାଳ ୮ଟାରେ ଏହି ଇ-ମେଲ୍ ବିଷୟରେ ଜାଣିବା ପରେ ତୁରନ୍ତ କର୍ତ୍ତୃପକ୍ଷଙ୍କୁ ଜଣାଇଥିଲେ। ଉତ୍ତର ଜିଲ୍ଲା ଡେପୁଟି କମିଶନର ଅଫ୍ ପୋଲିସ୍ (DCP), ରାଜା ବାନ୍ତିଆ କହିଛନ୍ତି, ରାମଜସ୍ କଲେଜର ଅଧ୍ୟକ୍ଷ ୧:୫୯ରେ ବୋମା ଧମକ ମିଳିଥିବା ଜଣାଇବା ପରେ ବୋମା ନିଷ୍କାସନକାରୀ ସ୍କ୍ୱାଡ୍ (BDS) ଏବଂ ପୋଲିସ୍ ପରିସରରେ ଖୋଜାଖୋଜି ଆରମ୍ଭ କରିଥିଲେ। ଉଭୟ କଲେଜକୁ ଅନେକ ବୋମା ନିଷ୍କାସନକାରୀ ସ୍କ୍ୱାଡ୍, ଅଗ୍ନିଶମ ବାହିନୀ ଗାଡ଼ି ଏବଂ ଶୁଙ୍ଘା କୁକୁର ପଠାଯାଇଥିଲା। ସମସ୍ତ କର୍ମଚାରୀ ଓ ଛାତ୍ରଛାତ୍ରୀଙ୍କୁ ସୁରକ୍ଷା ଦୃଷ୍ଟିରୁ ଖୋଲା ସ୍ଥାନକୁ ସ୍ଥାନାନ୍ତର କରାଯାଇଥିଲା।
ନଭେମ୍ବର ୧୦ରେ ରେଡ୍ ଫୋର୍ଟରେ ହୋଇଥିବା ବିସ୍ଫୋରଣ ପରଠାରୁ ଜାତୀୟ ରାଜଧାନୀରେ ଶିକ୍ଷାନୁଷ୍ଠାନଗୁଡ଼ିକୁ ଏହା ତୃତୀୟ ଥର ପାଇଁ ଏଭଳି ବୋମା ଧମକ ଦିଆଯାଇଛି, ଯାହା ଚିନ୍ତାର ବିଷୟ। ଏହା ପୂର୍ବରୁ ନଭେମ୍ବର ୨୦ରେ ଚାଣକ୍ୟପୁରୀର ବ୍ରିଟିଶ୍ ସ୍କୁଲ୍, ସଂସ୍କୃତି ସ୍କୁଲ୍, ବାରଖମ୍ବା ରୋଡ୍ର ମଡର୍ଣ୍ଣ ସ୍କୁଲ୍ ଏବଂ ଦୁନ୍ ସ୍କୁଲ୍କୁ ବୋମା ଧମକପୂର୍ଣ୍ଣ ଇ-ମେଲ୍ ଆସିଥିଲା। ଅଜଣା ବ୍ୟକ୍ତିବିଶେଷଙ୍କ ଦ୍ୱାରା ପଠାଯାଇଥିବା ଏହି ଇ-ମେଲ୍ରେ କୁହାଯାଇଥିଲା ଯେ ସ୍କୁଲ୍ ଭିତରେ ବୋମା ରହିଛି ଏବଂ ତୁରନ୍ତ ଖାଲି କରିବାକୁ ଚେତାବନୀ ଦିଆଯାଇଥିଲା। ସେହିପରି ନଭେମ୍ବର ୧୮ରେ ଦିଲ୍ଲୀର ତିନୋଟି ଜିଲ୍ଲା କୋର୍ଟ ସାକେତ୍, ରୋହିଣୀ ଏବଂ ପାଟିଆଲା ହାଉସ୍ ଏବଂ ଦୁଇଟି CRPF ଦ୍ୱାରା ପରିଚାଳିତ ସ୍କୁଲ୍ କୁ ମଧ୍ୟ ବୋମା ଧମକ ମିଳିଥିଲା। ଜୈଶ-ଏ-ମହମ୍ମଦ (JeM) ନାମରେ ପଠାଯାଇଥିବା ଏହି ଇ-ମେଲ୍ ମଧ୍ୟ ମିଥ୍ୟା ଥିଲା।
ଉଲ୍ଲେଖଯୋଗ୍ୟ ଯେ, ମେ ୨୦୨୪ରେ ମଧ୍ୟ ଲେଡି ଶ୍ରୀ ରାମ, ହଂସରାଜ ଏବଂ ରାମଜସ୍ ସମେତ ଅନେକ DU କଲେଜକୁ ସମାନ ଧରଣର ହୋକ୍ସ ବୋମା ଧମକ ମିଳିଥିଲା। ବାରମ୍ବାର ମିଥ୍ୟା ଧମକ ସୃଷ୍ଟି କରୁଥିବା ବ୍ୟକ୍ତିମାନଙ୍କୁ ଧରିବା ପାଇଁ ପୋଲିସ୍ ତଦନ୍ତ ଜାରି ରଖିଛି।
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
