ମହିଳା ପ୍ରିମିୟର ଲିଗ୍ (WPL) ୨୦୨୬ ମେଗା-ନିଲାମ ପୂର୍ବରୁ ଏକ ବଡ଼ ଖବର ସାମ୍ନାକୁ ଆସିଛି। ଅଷ୍ଟ୍ରେଲିଆ ର ଷ୍ଟାର ଅଲରାଉଣ୍ଡର ଜେସ୍ ଜୋନାସେନ୍ ଆହତଜନିତ ସମସ୍ୟା କାରଣରୁ ଚଳିତ ବର୍ଷର ନିଲାମ ପ୍ରକ୍ରିୟାରୁ ନିଜ ନାମ ପ୍ରତ୍ୟାହାର କରି ନେଇଛନ୍ତି। ଏହି ନିଷ୍ପତ୍ତି ପୂର୍ବରୁ ତାଙ୍କର ଟିମ୍ ଥିବା ଦିଲ୍ଲୀ କ୍ୟାପିଟାଲ୍ସ (Delhi Capitals) ପାଇଁ ଏକ ବଡ଼ ଝଟକା, କାରଣ ସେ ଗତ ତିନି ସିଜନ ଧରି ଦଳର ଏକ ଗୁରୁତ୍ୱପୂର୍ଣ୍ଣ ସଦସ୍ୟ ଥିଲେ।
ଜୋନାସେନ୍ ଖେଳୁଥିବା ସମସ୍ତ ତିନୋଟି ସିଜନରେ ଦିଲ୍ଲୀ କ୍ୟାପିଟାଲ୍ସ ଅଳ୍ପକେ ଟ୍ରଫିରୁ ବଞ୍ଚିତ ହୋଇ ଫାଇନାଲ୍ ଷ୍ଟେଜରେ ହାରିଯାଇଥିଲା। ତଥାପି, ପ୍ରତିଯୋଗିତାରେ ଜୋନାସେନଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଥିଲା। ତିନୋଟି ଯାକ ସିଜନରେ ସେ ଉଲ୍ଲେଖନୀୟ ପ୍ରଦର୍ଶନ କରି ମୋଟ ପାଞ୍ଚ ଥର ‘ପ୍ଲେୟାର ଅଫ୍ ଦି ମ୍ୟାଚ୍’ ପୁରସ୍କାର ଜିତିଥିଲେ।
୨୦୨୩ ମସିହାରେ ସେ ତାଙ୍କର ମୂଳ ଦର ୫୦ ଲକ୍ଷ ଟଙ୍କାରେ ଦିଲ୍ଲୀ କ୍ୟାପିଟାଲ୍ସରେ ସାମିଲ ହୋଇଥିଲେ। ବୋଲିଂରେ ସେ ପ୍ରଥମ ଦୁଇଟି ସିଜନରେ ୧୦ରୁ ଅଧିକ ୱିକେଟ୍ ଏବଂ ତୃତୀୟ ସିଜନରେ ୯ଟି ୱିକେଟ୍ ନେଇଥିଲେ। ବ୍ୟାଟିଂରେ ମଧ୍ୟ ତାଙ୍କର ଯୋଗଦାନ ଉଲ୍ଲେଖନୀୟ ଥିଲା। ମାତ୍ର ୧୮ ଇନିଂସରେ ସେ ୧୩୮.୪୯ ଷ୍ଟ୍ରାଇକ୍ ରେଟ୍ରେ ମୋଟ ୨୯୫ ରନ୍ ସଂଗ୍ରହ କରିଥିଲେ।
ଦିଲ୍ଲୀ କ୍ୟାପିଟାଲ୍ସ ବିଦେଶୀ ଖେଳାଳି କୋଟାରେ ଆନ୍ନାବେଲ୍ ସଦରଲ୍ୟାଣ୍ଡ ଏବଂ ମାରିଜାନେ କାପ୍ଙ୍କୁ ରିଟେନ୍ କରିବା ପରେ, ଜୋନାସେନ୍ ଛାଡ଼ି ଦିଆଯାଇଥିଲା। ଅନ୍ୟ ରିଟେନ୍ ଖେଳାଳିଙ୍କ ମଧ୍ୟରେ ଶେଫାଳି ବର୍ମା, ଜେମିମା ରୋଡ୍ରିଗ୍ସ ଓ ନିକି ପ୍ରସାଦ ଅଛନ୍ତି। ନିଲାମରେ ଜୋନାସେନ୍ ୩୦ ଲକ୍ଷ ଟଙ୍କାର ବେସ୍ ପ୍ରାଇସ୍ ସହିତ ଅଂଶଗ୍ରହଣ କରିବାର ଥିଲା, କିନ୍ତୁ ଆହତ କାରଣରୁ ସେ ଓହରି ଯିବା ଫଳରେ ଏକ ଦକ୍ଷ ଅଲରାଉଣ୍ଡରର ଖାଲି ସ୍ଥାନ ପୂରଣ କରିବା ପାଇଁ ଟିମ୍କୁ ଅନ୍ୟ ବିକଳ୍ପ ଖୋଜିବାକୁ ପଡ଼ିବ।
WPL ମେଗା-ନିଲାମ ମାର୍କି ସେଟ୍ ସହିତ ଆରମ୍ଭ ହେବ, ଯେଉଁଥିରେ ଆଲିସା ହିଲି, ଦୀପ୍ତି ଶର୍ମା, ଲୌରା ୱୋଲଭାର୍ଟ, ରେଣୁକା ସିଂହ ଠାକୁର, ସୋଫି ଡିଭାଇନ୍, ସୋଫି ଏକଲେଷ୍ଟୋନ୍, ମେଗ୍ ଲାନିଙ୍ଗ୍ ଏବଂ ଆମେଲିଆ କେର୍ ଭଳି ବିଶ୍ୱସ୍ତରୀୟ ଖେଳାଳିମାନେ ନିଲାମ ହେବେ। ଜୋନାସେନ୍ଙ୍କ ଅନୁପସ୍ଥିତି ନିଲାମ ରଣନୀତି ଉପରେ କିଛିଟା ପ୍ରଭାବ ପକାଇବ ବୋଲି ଆଶା କରାଯାଉଛି
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
