ଭୁବନେଶ୍ୱର: ରାଜ୍ୟର ଚିଟ୍ଫଣ୍ଡ୍ କ୍ଷତିଗ୍ରସ୍ତ କ୍ଷୁଦ୍ର ଜମାକାରୀଙ୍କ ପାଇଁ ଏକ ଆଶ୍ୱସ୍ତିକର ଖବର ଆସିଛି। ବହୁ ପ୍ରତୀକ୍ଷିତ ଟଙ୍କା ଫେରସ୍ତ ପ୍ରକ୍ରିୟାକୁ ତ୍ୱରାନ୍ୱିତ କରିବା ପାଇଁ ରାଜ୍ୟ ଅର୍ଥ ବିଭାଗ ପକ୍ଷରୁ ବିଜ୍ଞପ୍ତି ଜାରି କରାଯାଇଛି। ଯେଉଁ କ୍ଷୁଦ୍ର ଜମାକାରୀମାନେ ଏପର୍ଯ୍ୟନ୍ତ ନିଜର ଜମା ରାଶି ଫେରିପାଇ ନାହାନ୍ତି, ସେମାନେ ତୁରନ୍ତ ଆବେଦନ କରିବାକୁ ବିଭାଗ ପକ୍ଷରୁ ପରାମର୍ଶ ଦିଆଯାଇଛି। ଏହି ସମ୍ପୂର୍ଣ୍ଣ ପ୍ରକ୍ରିୟା ଆସନ୍ତା ୨୦୨୬ ଜାନୁଆରୀ ୩୧ ତାରିଖ ପର୍ଯ୍ୟନ୍ତ ଜାରି ରହିବ।
କିଏ ପାଇବେ ଟଙ୍କା?
ଅର୍ଥ ବିଭାଗର ସୂଚନା ଅନୁଯାୟୀ, ତଦନ୍ତ କମିଶନଙ୍କ ଦ୍ୱାରା ସୁପାରିସ କରାଯାଇଥିବା ସମସ୍ତ କ୍ଷୁଦ୍ର ଜମାକାରୀ ଏହି ସୁଯୋଗର ଲାଭ ଉଠାଇପାରିବେ।
- ୧୦ ହଜାର ଟଙ୍କା ପର୍ଯ୍ୟନ୍ତ ଜମା କରିଥିବା ବ୍ୟକ୍ତିମାନେ ଆବେଦନ କରିପାରିବେ।
- ଗୋଲ୍ଡେନ ଲ୍ୟାଣ୍ଡ ଡେଭଲପର୍ସ କମ୍ପାନୀ ସମୂହରେ ୮ ହଜାର ଟଙ୍କା ପର୍ଯ୍ୟନ୍ତ ଜମା କରି ପ୍ରଥମ ପର୍ଯ୍ୟାୟରେ ଟଙ୍କା ପାଇ ନଥିବା ଜମାକାରୀମାନଙ୍କୁ ମଧ୍ୟ ଏଥିରେ ସାମିଲ କରାଯାଇଛି।
କିଭଳି କରିବେ ଆବେଦନ:
ଜମାକାରୀମାନଙ୍କୁ ସେମାନଙ୍କ ଅଞ୍ଚଳର ରାଜସ୍ୱ ନିରୀକ୍ଷକ (RI) ଙ୍କ ସହ ଯୋଗାଯୋଗ କରିବାକୁ କୁହାଯାଇଛି। ଆବଶ୍ୟକ କାଗଜପତ୍ର ଦାଖଲ ଓ ଯାଞ୍ଚ ହେବାର ୧୫ ଦିନ ମଧ୍ୟରେ ଜମା ରାଶି ଫେରସ୍ତ ମିଳିବ ବୋଲି ସରକାର ପ୍ରତିଶୃତି ଦେଇଛନ୍ତି।
ଆବଶ୍ୟକ ଦସ୍ତାବିଜ:
- ଆଧାର କାର୍ଡ, ଭୋଟର କାର୍ଡ କିମ୍ବା ପାନ୍ କାର୍ଡ।
- ମୂଳ ଜମା ରସିଦ (Original Deposit Receipt)।
- ବ୍ୟାଙ୍କ ଆକାଉଣ୍ଟ ସମ୍ବନ୍ଧୀୟ ତଥ୍ୟ।
ଜମାକାରୀମାନେ ନିଜର ନାମ ଯାଞ୍ଚ କରିବା ପାଇଁ ନିଜ ଜିଲ୍ଲାର ସରକାରୀ ଓ୍ବେବସାଇଟ୍ ପରିଦର୍ଶନ କରିପାରିବେ। ଅଧିକ ସହାୟତା ପାଇଁ ସରକାରଙ୍କ ହେଲ୍ପଲାଇନ ନମ୍ବର ୦୬୭୪-୨୩୯୫୧୫୩ ରେ ମଧ୍ୟ ଯୋଗାଯୋଗ କରିହେବ।
ଏହି ପ୍ରସଙ୍ଗରେ ଚିଟ୍ଫଣ୍ଡ କ୍ଷତିଗ୍ରସ୍ତ ମିଳିତ ମଞ୍ଚର ଆବାହକ ଜୟନ୍ତ ଦାସ ସରକାରଙ୍କ ନିଷ୍ପତ୍ତିକୁ ସ୍ୱାଗତ କରିଛନ୍ତି। ତେବେ ସେ ମନେ ପକାଇ ଦେଇଛନ୍ତି ଯେ, ବିଜେପି ନିଜ ନିର୍ବାଚନ ଘୋଷଣା ପତ୍ରରେ ୧୮ ମାସ ମଧ୍ୟରେ ସମସ୍ତ (କ୍ଷୁଦ୍ର ଓ ବୃହତ) ଜମାକାରୀଙ୍କୁ ଟଙ୍କା ଫେରସ୍ତ କରିବାକୁ କହିଥିଲା। ସମସ୍ତଙ୍କୁ ଟଙ୍କା ନ ମିଳିଲେ ଆନ୍ଦୋଳନ କରାଯିବ ବୋଲି ସେ ଚେତାବନୀ ଦେଇଛନ୍ତି।
ଅନ୍ୟପଟେ, ସମବାୟ ମନ୍ତ୍ରୀ ପ୍ରଦୀପ ବଳସାମନ୍ତ କହିଛନ୍ତି ଯେ ସରକାର ପର୍ଯ୍ୟାୟକ୍ରମେ ସମସ୍ତଙ୍କ ଟଙ୍କା ଫେରାଇବେ। ପୂର୍ବ ସରକାରଙ୍କ ସମୟରେ ହୋଇଥିବା ଏହି ଦୁର୍ନୀତିର ସମାଧାନ ବର୍ତ୍ତମାନର ସରକାର କରୁଛନ୍ତି। ବିଜେପି ରାଜ୍ୟ ସଭାପତି ମନମୋହନ ସାମଲ ମଧ୍ୟ ପ୍ରକାଶ କରିଛନ୍ତି ଯେ ପ୍ରାୟ ୫ ଲକ୍ଷ କ୍ଷୁଦ୍ର ଜମାକାରୀଙ୍କୁ ଚିହ୍ନଟ କରାଯାଇଛି ଏବଂ ପ୍ରତିଶୃତି ମୁତାବକ ସମସ୍ତ ପ୍ରକ୍ରିୟା ଦ୍ରୁତଗତିରେ ଚାଲିଛି।
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
