ଭୁବନେଶ୍ୱର: ଆଜି ବିଧାନସଭା ପ୍ରଶ୍ନକାଳରେ ରାଜ୍ୟର ସ୍ୱାସ୍ଥ୍ୟସେବାକୁ ନେଇ ଶାସକ ଓ ବିରୋଧୀ ଦଳର ଦୁଇ ବରିଷ୍ଠ ନେତା ପୂର୍ବତନ ସ୍ୱାସ୍ଥ୍ୟମନ୍ତ୍ରୀ ନିରଞ୍ଜନ ପୂଜାରୀ ଓ ବର୍ତ୍ତମାନର ସ୍ୱାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ମୁହାଁମୁହିଁ ହୋଇଛନ୍ତି। ନିଜ ନିଜ ନିର୍ବାଚନମଣ୍ଡଳୀରେ ଡାକ୍ତର ଅଭାବ ଓ ସ୍ୱାସ୍ଥ୍ୟ ଭିତ୍ତିଭୂମିର ସମସ୍ୟା ଉପରେ ଦୁଇ ନେତାଙ୍କ ମଧ୍ୟରେ ତୀବ୍ର ଯୁକ୍ତିତର୍କ ହୋଇଛି, ଯାହା ଗୃହରେ ଏକ ଉଷ୍ମ ପରିବେଶ ସୃଷ୍ଟି କରିଥିଲା।
ବିଜେଡି ବିଧାୟକ ନିରଞ୍ଜନ ପୂଜାରୀ ପ୍ରଶ୍ନ ଉଠାଇ କହିଥିଲେ ଯେ ତାଙ୍କ ନିର୍ବାଚନମଣ୍ଡଳୀ ସୋନପୁରର ଜିଲ୍ଲା ମୁଖ୍ୟ ଚିକିତ୍ସାଳୟ (DHH)ର ନିର୍ମାଣ ଶୈଳୀ ଦେଶରେ ଦ୍ଵିତୀୟ ସ୍ଥାନରେ ରହିଛି, କିନ୍ତୁ ସେଠାରେ ଡାକ୍ତର ନାହାନ୍ତି। ସେ ଅଭିଯୋଗ କରିଥିଲେ ଯେ ସ୍ୱାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ନିଜ ଅଞ୍ଚଳକୁ ଭଲ ଡାକ୍ତରମାନଙ୍କୁ ବଦଳି କରି ନେଇଯାଉଛନ୍ତି। ଏହି କାରଣରୁ ସୋନପୁରର ଅନେକ ରୋଗୀ ଚିକିତ୍ସା ପାଇବାରୁ ବଞ୍ଚିତ ହେଉଛନ୍ତି। ଏହିଭଳି କ୍ଷେତ୍ରରେ ଉତ୍ତମ ଭିତ୍ତିଭୂମି ଥାଇ ମଧ୍ୟ ସାଧାରଣ ଲୋକେ ସେବାରୁ ବଞ୍ଚିତ ହେବା ଉଦ୍ବେଗଜନକ ବୋଲି ଶ୍ରୀ ପୂଜାରୀ କହିଥିଲେ।
ଏହାର ଜବାବରେ ସ୍ୱାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ପୂର୍ବ ସରକାରକୁ ଦାୟୀ କରି କହିଥିଲେ ଯେ ବିଜେଡି ସରକାର ୨୪ ବର୍ଷ ଧରି କ୍ଷମତାରେ ଥିବାବେଳେ ବର୍ତ୍ତମାନର ବିଜେପି ସରକାର ଉତ୍ତରାଧିକାରୀ ସୂତ୍ରରେ ଏହି ସମସ୍ତ ସ୍ୱାସ୍ଥ୍ୟ ସମସ୍ୟାକୁ ପାଇଛି। ସେ ପୂର୍ବତନ ମନ୍ତ୍ରୀଙ୍କୁ ସ୍ମରଣ କରାଇ ଦେଇଥିଲେ ଯେ ନିରଞ୍ଜନ ପୂଜାରୀ ନିଜେ ପୂର୍ବ ସରକାରରେ ସ୍ୱାସ୍ଥ୍ୟମନ୍ତ୍ରୀ ଥିଲେ, କିନ୍ତୁ ଏହି ଡାକ୍ତର ଅଭାବ ସମସ୍ୟାର ସମାଧାନ କରିପାରି ନଥିଲେ। ମୁଖ୍ୟମନ୍ତ୍ରୀ ମୋହନ ମାଝୀଙ୍କ ନେତୃତ୍ୱରେ ରାଜ୍ୟରେ ସରକାର ଆସିବାକୁ ମାତ୍ର ଦେଢ଼ ବର୍ଷ ହୋଇଛି ଏବଂ ଏହି ସ୍ୱଳ୍ପ ସମୟ ମଧ୍ୟରେ ସ୍ପେସିଆଲିଷ୍ଟ ଡାକ୍ତର ତିଆରି ହୋଇପାରିବେ ନାହିଁ।
ତଥାପି, ମନ୍ତ୍ରୀ ସୂଚନା ଦେଇଛନ୍ତି ଯେ ରାଜ୍ୟରେ ସ୍ୱାସ୍ଥ୍ୟ ସେବାରେ ସୁଧାର ଆଣିବା ପାଇଁ ବର୍ତ୍ତମାନ ସୁଦ୍ଧା ୫,୧୯୫ ମେଡିକାଲ୍ ଅଫିସର ଏବଂ ପାରା ମେଡିକାଲ୍ ଷ୍ଟାଫ୍ଙ୍କୁ ନିଯୁକ୍ତି ଦିଆଯାଇଛି। ସେ ସ୍ପଷ୍ଟ କରିଛନ୍ତି ଯେ ରାଜ୍ୟରେ ବିଶେଷଜ୍ଞ (ସ୍ପେସିଆଲିଷ୍ଟ) ଡାକ୍ତରଙ୍କର ଅଭାବ ରହିଛି, କିନ୍ତୁ ଆଗାମୀ ଦିନରେ ଏହି ପଦବୀଗୁଡ଼ିକ ଯୁଦ୍ଧକାଳୀନ ଭିତ୍ତିରେ ପୂରଣ କରାଯିବ। ସ୍ୱାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗଙ୍କ ଏହି ଜବାବ ପରେ ବିଧାନସଭାରେ ସ୍ୱାସ୍ଥ୍ୟସେବାକୁ ନେଇ ଚାଲିଥିବା ବିତର୍କ ସାମାନ୍ୟ ଶାନ୍ତ ପଡ଼ିଥିଲା। ଏହି ଘଟଣା ସ୍ୱାସ୍ଥ୍ୟ କ୍ଷେତ୍ରର ଦୀର୍ଘ ଦିନର ସମସ୍ୟା ଉପରେ ଆଲୋକପାତ କରିଛି।
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
