ବାଲେଶ୍ୱର: ରାଜ୍ୟରେ ଦୁର୍ନୀତିଖୋର ସରକାରୀ କର୍ମଚାରୀଙ୍କ ବିରୋଧରେ ଭିଜିଲାନ୍ସର କଠୋର ଆଭିମୁଖ୍ୟ ଜାରି ରହିଛି । ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଆଜି ସୁନ୍ଦରଗଡ଼ ସିଭିଲ ସପ୍ଲାଏ ଅଫିସରେ କାର୍ଯ୍ୟରତ ଜୁନିଅର ଆକାଉଣ୍ଟାଣ୍ଟ ରବୀନ୍ଦ୍ର କୁମାର ବାରିକଙ୍କ ଉପରେ ଭିଜିଲାନ୍ସ ବିଭାଗ ପକ୍ଷରୁ ଜୋରଦାର ଚଢ଼ାଉ କରାଯାଇଛି । ବାଲେଶ୍ୱରର ବିଭିନ୍ନ ସ୍ଥାନରେ ଏହି ଚଢ଼ାଉ କରାଯାଇଥିବା ବେଳେ ଏଥିରେ ବହୁ ପରିମାଣର ସମ୍ପତ୍ତି ଠାବ ହୋଇଥିବା ସୂଚନା ମିଳିଛି ।
ସୂଚନା ଅନୁଯାୟୀ, ରବୀନ୍ଦ୍ର କୁମାର ବାରିକଙ୍କ ବାଲେଶ୍ୱର ଚୂନ ଭାଟି ନିକଟରେ ଥିବା ବିଳାସପୂର୍ଣ୍ଣ ବାସଭବନ ‘ସାଇ ଗାର୍ଡେନ’ ଉପରେ ଭିଜିଲାନ୍ସ ଟିମ୍ ପ୍ରଥମେ ଚଢ଼ାଉ କରିଥିଲା । ଏହା ସହିତ ତାଙ୍କର ପୈତୃକ ଘର ଏବଂ ଅନ୍ୟାନ୍ୟ ସ୍ଥାନରେ ମଧ୍ୟ ଏକକାଳୀନ ରେଡ୍ ଚାଲିଛି । ଭିଜିଲାନ୍ସ ବିଭାଗର ଅଧିକାରୀମାନେ ବିଭିନ୍ନ ଟିମ୍ରେ ବିଭକ୍ତ ହୋଇ ଏହି ଅପରେସନ କରୁଛନ୍ତି । ଚଢ଼ାଉ ସମୟରେ ଘରର ଆସବାବପତ୍ର, ଗାଡ଼ି ଏବଂ ଜମିବାଡ଼ି ସମ୍ପର୍କିତ ବହୁ ଗୁରୁତ୍ୱପୂର୍ଣ୍ଣ କାଗଜପତ୍ର ଯାଞ୍ଚ କରାଯାଉଛି ।
ରବୀନ୍ଦ୍ର ବାରିକ ବର୍ତ୍ତମାନ ସୁନ୍ଦରଗଡ଼ ଜିଲ୍ଲା ସିଭିଲ ସପ୍ଲାଏ କାର୍ଯ୍ୟାଳୟରେ ଜୁନିଅର ଆକାଉଣ୍ଟାଣ୍ଟ ଭାବରେ କାର୍ଯ୍ୟ କରୁଛନ୍ତି । ତାଙ୍କ ନାମରେ ବହୁ ପରିମାଣର ଅପରିମିତ ସମ୍ପତ୍ତି ଠୁଳ କରିଥିବା ନେଇ ପୂର୍ବରୁ ଅଭିଯୋଗ ହୋଇଥିଲା । ସେ ଜଣେ ଅଣ-ଗେଜେଟେଡ୍ କର୍ମଚାରୀ ହୋଇଥିଲେ ମଧ୍ୟ ତାଙ୍କର ସମ୍ପତ୍ତି ଏବଂ ରହଣି ଶୈଳୀ ସାଧାରଣ ଲୋକଙ୍କୁ ଆଶ୍ଚର୍ଯ୍ୟ କରିଛି ।
ଚଢ଼ାଉ ସମୟରେ ବର୍ତ୍ତମାନ ସୁଦ୍ଧା କେତେ ଟଙ୍କାର ସମ୍ପତ୍ତି ଜବତ ହୋଇଛି, ସେ ନେଇ ଭିଜିଲାନ୍ସ ପକ୍ଷରୁ କୌଣସି ସ୍ପଷ୍ଟ ସୂଚନା ମିଳିନାହିଁ । ତେବେ ତାଙ୍କର ବାସଭବନ ଏବଂ ବାଲେଶ୍ୱରର ବିଭିନ୍ନ ମୂଲ୍ୟବାନ ସ୍ଥାନରେ ଥିବା ଜମିର ଦଲିଲ ମିଳିଥିବା କୁହାଯାଉଛି । ବ୍ୟାଙ୍କ୍ ଖାତା, ସୁନା ଗହଣା ଏବଂ ନଗଦ ଟଙ୍କାର ହିସାବ ମଧ୍ୟ ଅଧିକାରୀମାନେ କରୁଛନ୍ତି । ଚଢ଼ାଉ ଶେଷ ହେବା ପରେ ମୋଟ ସମ୍ପତ୍ତିର ମୂଲ୍ୟ ସମ୍ପର୍କରେ ଜଣାପଡ଼ିବ ।
ଏହି ଘଟଣା ବର୍ତ୍ତମାନ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି । ଜଣେ ଜୁନିଅର ଆକାଉଣ୍ଟାଣ୍ଟଙ୍କ ପାଖରେ ଏତେ ପରିମାଣର ସମ୍ପତ୍ତି କେଉଁଠୁ ଆସିଲା, ତାକୁ ନେଇ ଭିଜିଲାନ୍ସ ତନାଘନା ଜାରି ରଖିଛି ।
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
