ପଶ୍ଚିମ ବଙ୍ଗ ସାଧାରଣ ନିର୍ବାଚନ ପୂର୍ବରୁ ମାଷ୍ଟର ଷ୍ଟ୍ରୋକ୍ ଖେଳିଛନ୍ତି ଟିଏମସି ସୁପ୍ରିମୋ ତଥା ମୁଖ୍ୟମନ୍ତ୍ରୀ ମମତା ବାନାର୍ଜୀ । ମନ୍ଦିର, ମସଜିଦ ନିର୍ମାଣ ରାଜନୀତିଠୁ ଊର୍ଦ୍ଧ୍ୱକୁ ଉଠି ନେଇଛନ୍ତି କଠୋର ନିଷ୍ପତ୍ତି । ବାବ୍ରି ମଜସିଦ ନିର୍ମାଣ ପାଇଁ ଜିଦ୍ ଧରି ବସିଥିବା ଜଣେ ବିଧାୟକଙ୍କୁ ସସପେଣ୍ଡ କରିଛନ୍ତି ମୁଖ୍ୟମନ୍ତ୍ରୀ ମମତା ।
ସୂଚନା ଅନୁସାରେ, ସସପେଣ୍ଡ ହୋଇଥିବା ତୃଣମୂଳ କଂଗ୍ରେସ ବିଧାୟକ ହେଉଛନ୍ତି ହୁମାୟୁନ କବିର । କବିର ମୁର୍ଶିଦାବାଦରେ ଏକ ବାବ୍ରି ମସଜିଦ ନିର୍ମାଣ କରାଇବାକୁ ଅଡ଼ି ବସିଥିଲେ । କବିର ଡିସେମ୍ବର 6ରେ ବାବ୍ରି ମସଜିଦର ଶିଳାନ୍ୟାସ କରିବେ ବୋଲି ଘୋଷଣା କରିଥିଲେ । ଏହି ଅବସରରେ ମୁଖ୍ୟମନ୍ତ୍ରୀଙ୍କ ସହ ଅନ୍ୟ ବିଧାୟକମାନେ ମଧ୍ୟ ଉପସ୍ଥିତ ରହିବେ ବୋଲି ଘୋଷଣା କରିଥିଲେ ।
କିନ୍ତୁ ମମତା ବାନାର୍ଜୀ ଏହି ପ୍ରଚାରରୁ ନିଜକୁ ଦୂରେଇ ରଖିବା ସହ ଆଜି କବିରୁଙ୍କୁ ଦଳରୁ ସସପେଣ୍ଡ କରିଛନ୍ତି । ଦଳୀୟ ସୂତ୍ର ରିପୋର୍ଟରୁ ଜଣାପଡିଛି ଯେ, ହୁମାୟୁନ ଆଗକୁ ବିଧାୟକ ଟିକେଟ୍ ପାଇବା ପାଇଁ ମସଜିଦ୍ ରାଜନୀତି କରୁଛନ୍ତି । ଏଥିପାଇଁ ସେ ବେଙ୍ଗଲ ପୋଲିସକୁ ଚ୍ୟାଲେଞ୍ଜ୍ କରି କହିଥିଲେ- ଡିସେମ୍ବର 6ରେ ଯେମିତି ହେଉ ମୁର୍ଶିଦାବାଦରେ ବାବ୍ରି ମସଜିଦର ଶିଳାନ୍ୟାସ କରି ରହିବେ । ଏଥିରେ କେହି ତାଙ୍କୁ ଅଟକେଇ ପାରିବେ ନାହିଁ । ଶେଷରେ ତାଙ୍କ ଚ୍ୟାଲେଞ୍ଜ୍ ଓଲଟା ସାବ୍ୟସ୍ତ ହୋଇଛି । ଦଳର ସୁପ୍ରିମ ତାଙ୍କୁ ସସପେଣ୍ଡ ଲେଟର୍ ଧରାଇ ଦେଇଛନ୍ତି ।
ଟିଏମସି ପକ୍ଷରୁ କୁହାଯାଇଛି ଯେ ଏପରି ବିବାଦୀୟ ମାମଲାରେ ଦଳ ହୁମାୟୁନ୍ କବିରଙ୍କ ସହ କେବେ ହେଲେ ଠିଆ ହେବ ନାହିଁ । ଗୁରୁବାର ମୁର୍ଶିଦାବାଦ ଜିଲ୍ଲାରେ ମମତା ବାନାର୍ଜୀଙ୍କ ରାଲି ପୂର୍ବରୁ କବିରଙ୍କ ବିରୋଧରେ ଏହି କାର୍ଯ୍ୟାନୁଷ୍ଠାନ ନିଆଯାଇଛି । ମମତା ବାନାର୍ଜୀଙ୍କ ଏହି ବାର୍ତ୍ତା ଦଳୀୟ ବିଧାୟକ, ସାଂସଦ ଏବଂ ଅନ୍ୟାନ୍ୟ ନେତାଙ୍କୁ ବି ପଠାଇ ଦିଆଯାଇଛି ।
ପ୍ରକାଶ ଥାଉକି, ହୁମାୟୁନ୍ କବିର ମୁର୍ଶିଦାବାଦର ଭରତପୁର ବିଧାନସଭା ନିର୍ବାଚନମଣ୍ଡଳୀର ବିଧାୟକ । ମୁର୍ଶିଦାବାଦ ଜିଲ୍ଲାର ୧୯ଟି ଆସନ ମଧ୍ୟରୁ ଅଧିକାଂଶ ମୁସଲିମ ବହୁଳ । ସେ ମୁର୍ଶିଦାବାଦର ବେଲଡାଙ୍ଗାରେ ବାବ୍ରି ମସଜିଦର ଭିତ୍ତିପ୍ରସ୍ତର ସ୍ଥାପନ ପାଇଁ ଜିଦ୍ ଧରିଥିଲେ ।
Author: Debibandita Barick
ଭାରତୀୟ ଜନ ସଂଚାର ସଂସ୍ଥାନ(IIMC) ଢେଙ୍କାନାଳରୁ ସାମ୍ବାଦିକତା ପାଠ୍ୟକ୍ରମ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାନରେ କାମ କରିଛନ୍ତି। ରାଜନୀତି, ବିଜ୍ଞାନ, କ୍ରୀଡା, ମନୋରଞ୍ଜନ ଓ ସ୍ପେଶଲ ଷ୍ଟୋରୀ ଲେଖିବାରେ ବିଶେଷ ରୁଚି ଓ ଅଭିଜ୍ଞତା ରହିଛି।
