ଭୁବନେଶ୍ୱର: ଧାନ ସଂଗ୍ରହରେ ଅବ୍ୟବସ୍ଥା ଏବଂ ସରକାରଙ୍କ ପ୍ରତିଶ୍ରୁତି ପାଳନରେ ବିଫଳତା ପ୍ରତିବାଦରେ ଆଜି ଭୁବନେଶ୍ୱରରେ ଏକ ଐତିହାସିକ ଚାଷୀ ସମାବେଶ ଅନୁଷ୍ଠିତ ହୋଇଯାଇଛି। ବିରୋଧୀ ଦଳ ନେତା ନବୀନ ପଟ୍ଟନାୟକ ଏହି ସମାବେଶରେ ସିଧାସଳଖ ସରକାରଙ୍କୁ ଟାର୍ଗେଟ୍ କରିଛନ୍ତି। ସେ କହିଛନ୍ତି, “ଚାଷୀଙ୍କ ସୁରକ୍ଷା ପାଇଁ ଆମେ ସର୍ବଦା ପ୍ରତିବଦ୍ଧ ଏବଂ ସରକାରଙ୍କ ଅନ୍ୟାୟ ବିରୋଧରେ ଏହି ଲଢ଼େଇ ଆଗକୁ ଆହୁରି ଜୋରଦାର ହେବ।”
ବିଜେଡି ଉପସଭାପତି ପ୍ରସନ୍ନ ଆଚାର୍ଯ୍ୟ ଅଭିଯୋଗ କରିଛନ୍ତି ଯେ, ମଣ୍ଡିରେ ଧାନ ପଡ଼ି ରହିଥିଲେ ମଧ୍ୟ ସରକାର ‘୩୧୦୦ ଟଙ୍କା’ର ପ୍ରଲୋଭନ ଦେଖାଇ ଚାଷୀଙ୍କୁ ଶୋଷଣ କରୁଛନ୍ତି। କଟ୍ନି-ଛଟ୍ନି ଯୋଗୁଁ ଚାଷୀମାନେ କ୍ଵିଣ୍ଟାଲ ପିଛା ୫ ରୁ ୭ କିଲୋ ଧାନ ହରାଉଛନ୍ତି।
ଗତ ୪ ଦିନ ଧରି ଚାଷୀ ପ୍ରସଙ୍ଗରେ ବିଧାନସଭାରେ ବିଜେଡି ଓ କଂଗ୍ରେସର ହଟ୍ଟଗୋଳ ଯୋଗୁଁ ଗୃହ କାର୍ଯ୍ୟ ବାରମ୍ବାର ସ୍ଥଗିତ ହେଉଛି। ବିରୋଧୀ ଦଳ ସମସ୍ତ ବଳକା ଧାନ ସଂଗ୍ରହ ପାଇଁ ଦାବି କରିଛନ୍ତି।
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି ଯେ ସରକାର ଚାଷୀଙ୍କ ପାଇଁ ବଜେଟ୍ରେ ୪୨,୪୯୨ କୋଟି ଟଙ୍କା ବ୍ୟୟବରାଦ କରିଛନ୍ତି ଏବଂ ବିରୋଧୀ ଦଳ କେବଳ ଡ୍ରାମା କରୁଛନ୍ତି।
ବିଜେଡି ପକ୍ଷରୁ ଚେତାବନୀ ଦିଆଯାଇଛି ଯେ ଯଦି ତୁରନ୍ତ ସମସ୍ତ ଚାଷୀଙ୍କ ଧାନ ସଂଗ୍ରହ କରାଯାଇ ବୋନସ୍ ପ୍ରଦାନ ନକରାଯାଏ, ତେବେ ରାଜ୍ୟର ପ୍ରତିଟି ବ୍ଲକ୍ ଏବଂ ଜିଲ୍ଲା କାର୍ଯ୍ୟାଳୟ ଘେରାଉ କରାଯିବ।
ଆଜିର ଏହି ସମାବେଶ ଯୋଗୁଁ ରାଜଧାନୀର ମୁଖ୍ୟ ଛକ ଗୁଡ଼ିକରେ ବ୍ୟାପକ ପୋଲିସ ମୁତୟନ କରାଯାଇଛି। ସାଧାରଣ ଲୋକେ ଟ୍ରାଫିକ ସମସ୍ୟାର ସମ୍ମୁଖୀନ ହୋଇଥିଲେ ମଧ୍ୟ ଚାଷୀଙ୍କ ଏହି ଆନ୍ଦୋଳନକୁ ବିଭିନ୍ନ ମହଲରୁ ସମର୍ଥନ ମିଳୁଥିବା ଦେଖାଯାଉଛି।
