ଭୁବନେଶ୍ବର: ଚଳିତ ଖରିଫ ଋତୁରେ ଧାନ ସଂଗ୍ରହ ପ୍ରକ୍ରିୟାକୁ ସୁରୁଖୁରୁରେ ସମ୍ପାଦନ କରିବା ପାଇଁ ରାଜ୍ୟ ସରକାର ବ୍ୟାପକ ପଦକ୍ଷେପ ଗ୍ରହଣ କରିଛନ୍ତି । ଏହି ପରିପ୍ରେକ୍ଷୀରେ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ ଶ୍ରୀ କୃଷ୍ଣ ଚନ୍ଦ୍ର ପାତ୍ର ଲୋକସେବା ଭବନରେ ଓଡ଼ିଶା ରାଇସ୍ ମିଲର୍ସ ଆସୋସିଏସନ କର୍ମକର୍ତ୍ତାମାନଙ୍କ ସହ ଏକ ଉଚ୍ଚସ୍ତରୀୟ ସମୀକ୍ଷା ବୈଠକ କରିଛନ୍ତି । ଏହି ବୈଠକରେ ପଞ୍ଜିକୃତ ଚାଷୀମାନଙ୍କ ଠାରୁ ଧାନ ସଂଗ୍ରହ ଓ ସେମାନଙ୍କୁ ସଠିକ୍ ସମୟରେ ପ୍ରାପ୍ୟ ପ୍ରଦାନ ଉପରେ ଗୁରୁତ୍ୱାରୋପ କରାଯାଇଛି ।
ମନ୍ତ୍ରୀଙ୍କ ସହ ଆଲୋଚନା ସମୟରେ ମିଲର୍ସ ସଂଘ ପକ୍ଷରୁ ସମସ୍ତ ସହଯୋଗ ଯୋଗାଇ ଦେବା ପାଇଁ ପ୍ରତିଶ୍ରୁତି ଦିଆଯାଇଛି । ଚାଷୀମାନଙ୍କ ସ୍ୱାର୍ଥ ରକ୍ଷା ଦିଗରେ ମଧ୍ୟ ବୈଠକରେ ବିସ୍ତୃତ ଆଲୋଚନା କରାଯାଇଥିଲା । ଏହି ସମୀକ୍ଷା ବୈଠକରେ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ପ୍ରମୁଖ ଶାସନ ସଚିବ ଶ୍ରୀ ସଞ୍ଜୟ କୁମାର ସିଂ, ରାଜ୍ୟ ଖାଦ୍ୟ ଯୋଗାଣ ନିଗମ ପରିଚାଳନା ନିର୍ଦ୍ଦେଶକ ଶ୍ରୀ ସୁଦର୍ଶନ ଚକ୍ରବର୍ତ୍ତୀଙ୍କ ସମେତ ଓଡ଼ିଶା ରାଇସ ମିଲର୍ସ ଆସୋସିଏସନର ସଭାପତି ଶ୍ରୀ ମହେଶ କୁମାର ବଂଶଲ ଏବଂ ସାଧାରଣ ସମ୍ପାଦକ ଶ୍ରୀ ଲକ୍ଷ୍ମୀନାରାୟଣ ଦୀପକ ରଞ୍ଜନ ଦାସ ପ୍ରମୁଖ ଉପସ୍ଥିତ ଥିଲେ ।
ରାଜ୍ୟ ସ୍ତରରେ ଧାନ କିଣା ପ୍ରକ୍ରିୟାକୁ ସୁଗମ କରିବା ପାଇଁ ଆଲୋଚନା ଚାଲିଥିବା ବେଳେ, ପଶ୍ଚିମ ଓଡ଼ିଶାର ସମ୍ବଲପୁର ଭଳି ଜିଲ୍ଲାରେ ମଣ୍ଡିରୁ ଧାନ ଉଠି ନ ପାରିବା ଯୋଗୁଁ ଚାଷୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି । ପୂର୍ବ ନିର୍ଦ୍ଧାରିତ ସମୟ ଅନୁଯାୟୀ ଧାନ କିଣା ଆରମ୍ଭ ହୋଇ ନ ପାରିବାରୁ ବରେଇପାଲି ଏବଂ ଅନ୍ୟ ମଣ୍ଡିଗୁଡ଼ିକରେ ଧାନ ନେଇ ପହଞ୍ଚିଥିବା ଚାଷୀମାନେ ଆନ୍ଦୋଳନ ପାଇଁ ପ୍ରସ୍ତୁତ ହେଉଛନ୍ତି ।
ଧାନ କିଣା ଆରମ୍ଭ ନ ହେବାର ମୁଖ୍ୟ କାରଣ ହେଉଛି ଯୋଗାଣ ଅଧିକାରୀ ଓ ମିଲର୍ସମାନଙ୍କ ମଧ୍ୟରେ ବୈଠକରେ ଉପୁଜିଥିବା ବିବାଦ । ଧାନ ଗଚ୍ଛିତ ରଖିବା ପାଇଁ ମିଲର୍ସମାନଙ୍କର ୩ ବର୍ଷର ବକେୟା ଭଡ଼ା ମିଳି ନ ଥିବାରୁ, ଏବଂ ଟ୍ରାନ୍ସପୋର୍ଟ ଭଡ଼ା ବୃଦ୍ଧି ଦାବି ପୂରଣ ନ ହେବାରୁ ମିଲର୍ସମାନେ ବୈଠକ ଅଧାରୁ ଉଠି ଚାଲିଯାଇଥିଲେ । ଫଳରେ ମଣ୍ଡିରୁ ଧାନ ଉଠାଣ ବନ୍ଦ ରହିଥିଲା ।
ଏଭଳି ସ୍ଥିତିରେ ଧାନ ବିକ୍ରି କରି ନ ପାରିବାର ଆଶଙ୍କାରେ ଚାଷୀମାନେ ରାସ୍ତାରେ ଧାନ ରଖି ଆନ୍ଦୋଳନ କରିବା ପାଇଁ ଚେତାବନୀ ଦେଇଥିଲେ । ଚାଷୀଙ୍କ ଏହି ଉତ୍ତେଜନା ପରେ ସମ୍ବଲପୁର ଉପ ଜ଼ିଲ୍ଲାପାଳ ତୁରନ୍ତ ମଣ୍ଡିରେ ପହଞ୍ଚି ଚାଷୀଙ୍କ ସହ ଆଲୋଚନା କରିଥିଲେ । ଉପ ଜିଲ୍ଲାପାଳଙ୍କ ହସ୍ତକ୍ଷେପ ପରେ ଖୁବଶୀଘ୍ର ଧାନ ଉଠାଣ କାର୍ଯ୍ୟ ଆରମ୍ଭ ହେବ ବୋଲି ନିଷ୍ପତ୍ତି ହୋଇଛି ।
ଗୋଟିଏ ପଟେ ରାଜ୍ୟ ସରକାର ଧାନ କିଣା ପ୍ରକ୍ରିୟାକୁ ସୁବ୍ୟବସ୍ଥିତ କରିବା ପାଇଁ ମିଲର୍ସମାନଙ୍କ ସହ ଆଲୋଚନା ଓ ସମୀକ୍ଷା କରୁଥିବା ବେଳେ, ଅନ୍ୟ ପଟେ ବକେୟା ପାଉଣା ଓ ପରିବହନ ଭଡ଼ା ବୃଦ୍ଧି ଭଳି ଦାବିକୁ ନେଇ ମିଲର୍ସ ଓ ପ୍ରଶାସନ ମଧ୍ୟରେ ଉପୁଜିଥିବା ମତଭେଦ ଯୋଗୁଁ ସମ୍ବଲପୁର ଭଳି ଜିଲ୍ଲାରେ ପ୍ରକୃତ ଧାନ କିଣା କାର୍ଯ୍ୟରେ ବାଧା ସୃଷ୍ଟି ହୋଇଛି । ଏହି ସମସ୍ୟାର ତ୍ୱରିତ ସମାଧାନ ନ ହେଲେ ଆଗାମୀ ଦିନରେ ଚାଷୀ ଆନ୍ଦୋଳନ ବ୍ୟାପକ ହେବାର ସମ୍ଭାବନା ରହିଛି
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
