ପୁରୀ: ପୁରୀ ଜିଲ୍ଲା ପୋଲିସ ଏକ ବଡ଼ ଧରଣର ଲୁଟ୍ ଘଟଣାର ପର୍ଦ୍ଦାଫାସ୍ କରିବାରେ ସଫଳ ହୋଇଛି। ଗତ ନଭେମ୍ବର ୨୦ ତାରିଖରେ ଚାନ୍ଦନପୁର ଥାନା ଅଞ୍ଚଳରେ ଘଟିଥିବା ୭୮ ଲକ୍ଷ ୯୬ ହଜାର ଟଙ୍କା ମୂଲ୍ୟର ସୁନା, ରୁପା ଓ ନଗଦ ଟଙ୍କା ଲୁଟ୍ ମାମଲାର ସମାଧାନ କରି ପୋଲିସ ଚାରି ଜଣ ଅଭିଯୁକ୍ତଙ୍କୁ ଗିରଫ କରିଛି। ଏହି ସଫଳ ଅଭିଯାନର ନାମ ଦିଆଯାଇଥିଲା “ଅପରେସନ୍ ହ୍ୱାଇଟ୍ ମେଟାଲ୍”।
ଘଟଣାଟି ନଭେମ୍ବର ୨୦, ୨୦୨୫ ରାତି ପ୍ରାୟ ୦୯:୪୫ ମିନିଟ୍ ସମୟରେ ଘଟିଥିଲା। ଚାନ୍ଦନପୁର ଅନ୍ତର୍ଗତ ସମଜାଜପୁର ରେଳ ଓଭରବ୍ରିଜ୍ ନିକଟସ୍ଥ NH-316ରେ ରାଧା କୃଷ୍ଣ ଜୁଏଲେରୀର ମାଲିକ ସଞ୍ଜୟ କୁମାର ଦାସଙ୍କ ଗାଡ଼ିକୁ କିଛି ଦୁର୍ବୃତ୍ତ ଅଟକାଇଥିଲେ। ବନ୍ଧୁକ ଦେଖାଇ ଲୁଟେରାମାନେ ଗାଡ଼ିରେ ଥିବା ସୁନା, ରୁପା ଏବଂ ନଗଦ ଟଙ୍କା ଧରି ଫେରାର୍ ହୋଇଯାଇଥିଲେ। ଏହି ଲୁଟ୍ ଘଟଣା ପରେ ଚାନ୍ଦନପୁର ଥାନା ରେ ମାମଲା ରୁଜୁ ହୋଇଥିଲା ।
ଘଟଣାର ଗମ୍ଭୀରତାକୁ ଦେଖି ପୁରୀ ଏସପିଙ୍କ ନିର୍ଦ୍ଦେଶକ୍ରମେ ଲୁଟେରାଙ୍କୁ ଧରିବା ପାଇଁ ଦୁଇଟି ସ୍ୱତନ୍ତ୍ର ଅନୁସନ୍ଧାନ ୱିଙ୍ଗ୍ ଗଠନ କରାଯାଇଥିଲା। ପ୍ରାରମ୍ଭରେ ଧାରା ୩୦୯(୪) BNS/୨୫/୨୭ ଆର୍ମ୍ସ ଆକ୍ଟରେ ମାମଲା ରୁଜୁ ହୋଇଥିବାବେଳେ ପରବର୍ତ୍ତୀ ସମୟରେ ଏହାକୁ ଧାରା ୩୧୦(୨) BNS r/w ୨୫/୨୭ ଆର୍ମ୍ସ ଆକ୍ଟକୁ ପରିବର୍ତ୍ତନ କରାଯାଇଥିଲା।
ଷଡ଼ଯନ୍ତ୍ରର ପର୍ଦ୍ଦାଫାସ୍:
ସୁରକ୍ଷା ବାହିନୀ ବିଭିନ୍ନ ସ୍ଥାନରେ ଚଢ଼ାଉ କରି ଡିସେମ୍ବର ୦୧ ଓ ୦୨ ତାରିଖରେ ମୋଟ୍ ଚାରି ଜଣ ଅଭିଯୁକ୍ତଙ୍କୁ ଗିରଫ କରିଥିଲା। ଏହି ଘଟଣାରେ ମୁଖ୍ୟ ଷଡ଼ଯନ୍ତ୍ରକାରୀ ଭାବରେ ସ୍ଥାନୀୟ ଅଞ୍ଚଳର ଅନ୍ୟ ଏକ ଗହଣା ଦୋକାନର ମାଲିକ ଟୁକୁଳା ଟୁକୁ ନାୟକ (୪୫) ସାମିଲ୍ ଥିଲେ। ସେ ଅଭିଯୋଗକାରୀଙ୍କର ଜଣେ ପରିଚିତ ବ୍ୟକ୍ତି ଥିବାରୁ ଏହି ଲୁଟ୍ ପାଇଁ ମାଷ୍ଟରମାଇଣ୍ଡ୍ ସାଜିଥିଲେ।
ଅନ୍ୟ ଅଭିଯୁକ୍ତମାନେ ହେଲେ ପୁରୀର ଏକ ହୋଟେଲ କର୍ମଚାରୀ ବାପି (ପ୍ରଶାନ୍ତ ପ୍ରଧାନ) (୪୧), ଯିଏ ଆନ୍ଧ୍ର ପ୍ରଦେଶରୁ ଅଭିଜ୍ଞ ଅପରାଧୀଙ୍କୁ ଲୁଟ୍ ପାଇଁ ନିଯୁକ୍ତ କରିଥିଲା। ଲୁଟ୍ରେ ସିଧାସଳଖ ସାମିଲ୍ ଥିବା ଅନ୍ୟ ଦୁଇ ଅଭିଯୁକ୍ତ ହେଲେ ଏମ୍. ଗୌତମ (୨୪) ଏବଂ ଜଣେ MBA ଛାତ୍ର ଶୁଭ୍ରଜିତ୍ ମହାନ୍ତି (୨୨)।
ଅନୁସନ୍ଧାନରୁ ଜଣାପଡ଼ିଛି ଯେ ଅଭିଯୁକ୍ତମାନେ ଲୁଟ୍ ପାଇଁ ଏକ ହ୍ୱାଇଟ୍ ସ୍କୋଡା (AP-05CY-8656) କାର୍ ଓ ଏକ TVS ସ୍ପୋର୍ଟସ୍ ମୋଟରସାଇକେଲ୍ ବ୍ୟବହାର କରିଥିଲେ। ଅଭିଯୁକ୍ତମାନଙ୍କ ଠାରୁ ପୋଲିସ ଲୁଟ୍ ହୋଇଥିବା ସମସ୍ତ ସାମଗ୍ରୀ ସଫଳତାର ସହ ଉଦ୍ଧାର କରିଛି, ଯାହାର ମୋଟ୍ ମୂଲ୍ୟ ପ୍ରାୟ ୭୮ ଲକ୍ଷ ୯୬ ହଜାର ଟଙ୍କା।
ଜବତ ସାମଗ୍ରୀ:
୮ଟି ନେକଲେସ୍ (ମୋଟ୍ ୧୩୨ ଗ୍ରାମ୍) ରୁପା ୩୧ କିଲୋଗ୍ରାମ୍, ନଗଦ ଟଙ୍କା ୬ ଲକ୍ଷ ଟଙ୍କା, ଗୋଟିଏ ପିସ୍ତଲ ସହ ୨ଟି ଜୀବନ୍ତ ଗୁଳି, ଗୋଟିଏ ହ୍ୱାଇଟ୍ ସ୍କୋଡା କାର୍ ଏବଂ ଗୋଟିଏ TVS ସ୍ପୋର୍ଟସ୍ ମୋଟରସାଇକେଲ୍, ମୋବାଇଲ୍ ଫୋନ୍ ୬ଟି।
ପୋଲିସ ପକ୍ଷରୁ ସ୍ପଷ୍ଟ କରାଯାଇଛି ଯେ ଅନ୍ୟ କେହି ଏହି ଲୁଟ୍ରେ ସାମିଲ୍ ଅଛନ୍ତି କି ନାହିଁ, ସେ ନେଇ ଅଧିକ ତଦନ୍ତ ଜାରି ରହିଛି। “ଅପରେସନ୍ ହ୍ୱାଇଟ୍ ମେଟାଲ୍” ମାଧ୍ୟମରେ ପୁରୀ ପୋଲିସ ସଂଗଠିତ ଅପରାଧକୁ ମୁକାବିଲା କରିବାରେ ଏକ ବଡ଼ ସଫଳତା ପାଇଛି।
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
