ସୋମବାର ମଧ୍ୟରାତ୍ରିରେ ପାକିସ୍ତାନ ସେନା ଦ୍ୱାରା ଆଫଗାନିସ୍ତାନର ତିନୋଟି ପ୍ରଦେଶ – ଖୋସ୍ତ, କୁନାର ଏବଂ ପାକ୍ତିକାରେ ହୋଇଥିବା ଏୟାର ଷ୍ଟ୍ରାଇକ୍ ଯୋଗୁଁ ଦୁଇ ଦେଶ ମଧ୍ୟରେ ଉତ୍ତେଜନା ବଢିଯାଇଛି। ଖୋସ୍ତ ଆକ୍ରମଣରେ ୯ ଶିଶୁ ଏବଂ ଜଣେ ମହିଳାଙ୍କ ସମେତ ମୋଟ ୧୦ ଜଣ ନିରୀହ ଲୋକଙ୍କର ମୃତ୍ୟୁ ହୋଇଥିବା ତାଲିବାନ ପକ୍ଷରୁ କୁହାଯାଇଛି। ତାଲିବାନ ମୁଖପାତ୍ର ଜବିହୁଲ୍ଲା ମୁଜାହିଦ୍ କହିଛନ୍ତି ଯେ ରାତି ପ୍ରାୟ ୧୨ଟା ସମୟରେ ପାକିସ୍ତାନୀ ବିମାନ ଖୋସ୍ତ ପ୍ରଦେଶର ମୁଗଲଗାଇ ଅଞ୍ଚଳରେ ଏକ ଘର ଉପରେ ବୋମା ପକାଇଥିଲା, ଯେଉଁଥିରେ ୫ ପୁଅ, ୪ ଝିଅ ଏବଂ ଜଣେ ମହିଳାଙ୍କ ଜୀବନ ଯାଇଛି। ଏହା ବ୍ୟତୀତ, କୁନାର ଏବଂ ପାକ୍ତିକା ପ୍ରଦେଶରେ ମଧ୍ୟ ପାକିସ୍ତାନର ଆକ୍ରମଣ ଓ ରେଡ୍ ଯୋଗୁଁ ଚାରି ଜଣ ସାଧାରଣ ନାଗରିକ ଆହତ ହୋଇଛନ୍ତି। ଆଫଗାନିସ୍ତାନ ଅଭିଯୋଗ କରିଛି ଯେ ଏହି ଆକ୍ରମଣ ଇସ୍ତାନବୁଲରେ ହୋଇଥିବା ଅସ୍ତ୍ରବିରତି ଚୁକ୍ତିର ଉଲ୍ଲଂଘନ। ଅନ୍ୟପକ୍ଷରେ, ଏହି ଘଟଣାକୁ ନେଇ ପାକିସ୍ତାନ ସେନା କିମ୍ବା ବୈଦେଶିକ ମନ୍ତ୍ରଣାଳୟ ପକ୍ଷରୁ ଏପର୍ଯ୍ୟନ୍ତ କୌଣସି ପ୍ରତିକ୍ରିୟା ପ୍ରକାଶ ପାଇନାହିଁ।
ଏହି ଏୟାର ଷ୍ଟ୍ରାଇକ୍ ଏପରି ଏକ ସମୟରେ ହୋଇଛି, ଯେତେବେଳେ ପାକିସ୍ତାନ ନିଜେ ସୁରକ୍ଷା ଆହ୍ୱାନ ସହ ସଂଗ୍ରାମ କରୁଛି। ଖୋସ୍ତରେ ଆକ୍ରମଣ ହୋଇଥିବା ସନ୍ଧ୍ୟାରେ, ପାକିସ୍ତାନର ପେଶୱାର ସ୍ଥିତ ଫ୍ରଣ୍ଟିଅର କନଷ୍ଟାବୁଲାରୀ ମୁଖ୍ୟାଳୟରେ ଏକ ବଡ଼ ଆତ୍ମଘାତୀ ଆକ୍ରମଣ ହୋଇଥିଲା। ଏହି ମୁଖ୍ୟାଳୟ ସେନା କ୍ୟାଣ୍ଟନମେଣ୍ଟ ଅଞ୍ଚଳ ନିକଟରେ ଅବସ୍ଥିତ। ଏହି ଆକ୍ରମଣରେ ତିନି କମାଣ୍ଡୋ ଏବଂ ତିନି ଆକ୍ରମଣକାରୀଙ୍କ ସମେତ ମୋଟ ଛଅ ଜଣଙ୍କର ମୃତ୍ୟୁ ହୋଇଥିବା ବେଳେ ଅନେକ ଲୋକ ଆହତ ହୋଇଥିଲେ। ପୋଲିସର ପ୍ରାରମ୍ଭିକ ରିପୋର୍ଟ ଅନୁଯାୟୀ, ଆକ୍ରମଣକାରୀ ଜଣେ ଚେକପଏଣ୍ଟ ନିକଟରେ ନିଜକୁ ବିସ୍ଫୋରଣ କରିଥିଲା।
ଆଫଗାନିସ୍ତାନ ଏବଂ ପାକିସ୍ତାନ ମଧ୍ୟରେ ସମ୍ପର୍କ ଗତ କିଛି ମାସ ହେବ ଅତ୍ୟନ୍ତ ତିକ୍ତ ହୋଇଛି। ଅକ୍ଟୋବରରେ ଦୁଇ ଦେଶର ସେନା ମଧ୍ୟରେ ହୋଇଥିବା ସଂଘର୍ଷରେ ଅନେକ ଲୋକ ପ୍ରାଣ ହରାଇଥିଲେ, ଯାହା ୨୦୨୧ରେ ତାଲିବାନ କ୍ଷମତାକୁ ଫେରିବା ପରଠାରୁ ସବୁଠାରୁ ବଡ଼ ହିଂସା ଥିଲା। ଉଭୟ ଦେଶ ଅକ୍ଟୋବରରେ ଦୋହାରେ ଅସ୍ତ୍ରବିରତି ଚୁକ୍ତି ସ୍ୱାକ୍ଷର କରିଥିଲେ ମଧ୍ୟ ପରେ ତୁର୍କୀରେ ହୋଇଥିବା ଶାନ୍ତି ଆଲୋଚନା କୌଣସି ଦୀର୍ଘକାଳୀନ ସମାଧାନରେ ପହଞ୍ଚିପାରି ନଥିଲା। ଏହି ମତଭେଦର ମୁଖ୍ୟ କାରଣ ହେଉଛି ଉଗ୍ରବାଦୀ ଗୋଷ୍ଠୀ, ଯେଉଁମାନଙ୍କୁ ପାକିସ୍ତାନ ଶତ୍ରୁ ବୋଲି ବିବେଚନା କରେ ଏବଂ ଯେଉଁମାନେ ଆଫଗାନିସ୍ତାନରେ ଆଶ୍ରୟ ନେଉଛନ୍ତି। ପାକିସ୍ତାନ ବାରମ୍ବାର ଅଭିଯୋଗ କରେ ଯେ ଆଫଗାନିସ୍ତାନ, ପାକିସ୍ତାନ-ତାଲିବାନ (TTP)କୁ ତାର ମାଟିରୁ ପାକିସ୍ତାନ ଉପରେ ଆକ୍ରମଣ କରିବାକୁ ଅନୁମତି ଦେଉଛି। କିନ୍ତୁ କାବୁଲ ଏହି ଅଭିଯୋଗକୁ ଖଣ୍ଡନ କରିଛି। ଆଫଗାନ ସାମ୍ବାଦିକ ଶବ୍ବିର ଅହମ୍ମଦଙ୍କ ମତରେ, ତାଲିବାନ ଶାସନ TTPକୁ ଆତଙ୍କବାଦୀ ସଂଗଠନ ଭାବେ ନ ଦେଖି ଏକ ଆଦର୍ଶଗତ ସହଯୋଗୀ ଭାବରେ ଦେଖେ। ତାଲିବାନ ସରକାର ଭୟ କରୁଛନ୍ତି ଯେ TTP ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କଲେ ଆଭ୍ୟନ୍ତରୀଣ ବିଦ୍ରୋହ ହୋଇପାରେ।
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
