ପରୀକ୍ଷା ଋତୁ ପାଖେଇ ଆସୁଥିବା ବେଳେ ଛାତ୍ରଛାତ୍ରୀଙ୍କ ମନରୁ ଚାପ ହଟାଇବା ପାଇଁ ପୁଣି ଥରେ ଫେରିଛି ‘ପରୀକ୍ଷା ପେ ଚର୍ଚ୍ଚା’। ଫେବୃଆରୀ ୬, ୨୦୨୬ ସକାଳ ୧୦ଟା ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସାରା ଦେଶର ଛାତ୍ରଛାତ୍ରୀ, ଶିକ୍ଷକ ଓ ଅଭିଭାବକଙ୍କ ସହ ସିଧାସଳଖ ଆଲୋଚନା କରିଛନ୍ତି। ଏହି ବର୍ଷ ଦିଲ୍ଲୀ ସ୍ଥିତ ୭, ଲୋକ କଲ୍ୟାଣ ମାର୍ଗ ସମେତ ଦେବମୋଗ୍ରା, କୋଏମ୍ବାଟୁର, ରାୟପୁର ଓ ଗୌହାଟୀ ଭଳି ବିଭିନ୍ନ ସହରର ପରୀକ୍ଷା ଯୋଦ୍ଧାମାନେ ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ।
ପ୍ରଧାନମନ୍ତ୍ରୀ ମୋଦୀ ପିଲାମାନଙ୍କୁ ପରାମର୍ଶ ଦେଇ କହିଛନ୍ତି ଯେ, “ସ୍ୱପ୍ନ ନଦେଖିବା ଏକ ଅପରାଧ।” ସେ ଛାତ୍ରଛାତ୍ରୀଙ୍କୁ ବଡ଼ ସ୍ୱପ୍ନ ଦେଖିବା ଓ ସେଥିପାଇଁ କଠିନ ପରିଶ୍ରମ କରିବାକୁ ଉତ୍ସାହିତ କରିଛନ୍ତି। ନିଜ ବକ୍ତବ୍ୟରେ ସେ ଏକ ଭାବପୂର୍ଣ୍ଣ ଭିଡିଓର ଅବତାରଣା କରିଥିଲେ, ଯେଉଁଥିରେ ଅସୁବିଧା ସତ୍ତ୍ୱେ ଜଣେ ଶିଶୁର ପାଠପଢ଼ା ପ୍ରତି ଥିବା ଏକାଗ୍ରତା ସମସ୍ତଙ୍କୁ ପ୍ରେରିତ କରିଥିଲା। ପ୍ରଧାନମନ୍ତ୍ରୀ କହିଛନ୍ତି ଯେ ସୁବିଧା ସୁଯୋଗର ଅଭାବ କେବେ ବି ସଫଳତା ପାଇଁ ବାଧକ ହେବା ଉଚିତ ନୁହେଁ।
କେବଳ ମାର୍କ ପଛରେ ନଗୋଡ଼ାଇ ନିଜର ଦକ୍ଷତା ବଢ଼ାଇବାକୁ ସେ କହିଛନ୍ତି। ଦୃଷ୍ଟିକୋଣ ପ୍ରସାରିତ କରିବା ପାଇଁ ମହାପୁରୁଷଙ୍କ ଜୀବନୀ ପଢ଼ିବାକୁ ସେ ପରାମର୍ଶ ଦେଇଛନ୍ତି। ତା ସହିତ ସନ୍ତୁଳିତ ଜୀବନଶୈଳୀ, ସଠିକ୍ ଖାଦ୍ୟପେୟ ଓ ମନକୁ ଶାନ୍ତ ରଖିବା ପରୀକ୍ଷା ସମୟରେ ଅତ୍ୟନ୍ତ ଜରୁରୀ। ପିଲାମାନଙ୍କୁ ଜଣେ ଭଲ ମଣିଷ ଭାବେ ଗଢ଼ିତୋଳିବା ପାଇଁ ସେ ଶିକ୍ଷକମାନଙ୍କୁ ଆହ୍ୱାନ ଦେଇଛନ୍ତି। ପ୍ରଧାନମନ୍ତ୍ରୀଙ୍କ ଏହି ସହଜ ଓ ସରଳ ପରାମର୍ଶ ଛାତ୍ରଛାତ୍ରୀଙ୍କୁ ଆତ୍ମବିଶ୍ୱାସର ସହ ପରୀକ୍ଷା ହଲକୁ ଯିବା ପାଇଁ ନୂଆ ଶକ୍ତି ଯୋଗାଇଛି।
