କଳାହାଣ୍ଡି (ଧର୍ମଗଡ଼): କଳାହାଣ୍ଡି ଜିଲ୍ଲା ଧର୍ମଗଡ଼ ଥାନା ଅନ୍ତର୍ଗତ ଗଡ଼ିଆଜୋର ଗ୍ରାମରେ ସୋମବାର ଅର୍ଥାତ୍ ଆଜି ସକାଳୁ ଏକ ଅଭାବନୀୟ ଘଟଣା ଘଟିଛି। ଜଣେ ୬୨ ବର୍ଷୀୟା ଅବସରପ୍ରାପ୍ତ ଏଏନ୍ଏମ୍ (ANM) ସୁପରାଇଜରଙ୍କ ମୃତଦେହ ତାଙ୍କ ନିଜ ଘର ସାମ୍ନାରୁ ରକ୍ତ ଜୁଡୁବୁଡୁ ଅବସ୍ଥାରେ ଉଦ୍ଧାର କରାଯାଇଛି। ମୃତ ମହିଳାଙ୍କ ନାମ ସୁଚିତ୍ରା ଖୁଣ୍ଟିଆ ବୋଲି ଜଣାପଡ଼ିଛି।
ସୂଚନା ଅନୁଯାୟୀ, ସୁଚିତ୍ରା ଦେବୀ ଗଡ଼ିଆଜୋର ଗ୍ରାମରେ ଥିବା ତାଙ୍କ ବାସଭବନରେ ଏକାକୀ ରହୁଥିଲେ। ତାଙ୍କ ସ୍ୱାମୀ ଓ ପୁଅ କୌଣସି କାର୍ଯ୍ୟ ବ୍ୟପଦେଶରେ ବାହାରେ ରହୁଥିବାରୁ ସେ ଘରେ ଏକୁଟିଆ ଥିଲେ। ସୋମବାର ସକାଳେ ସ୍ଥାନୀୟ ଲୋକେ ତାଙ୍କ ମୃତଦେହ ଘର ସାମ୍ନାରେ ପଡ଼ିଥିବା ଦେଖି ପୋଲିସକୁ ଖବର ଦେଇଥିଲେ। ମୃତଦେହ ପାଖରେ ଥିବା ଘରର କବାଟ ତାଲା ଭଙ୍ଗା ଯାଇଥିବା ଦେଖିବାକୁ ମିଳିଛି, ଯାହା ଏକ ବଡ଼ ଧରଣର ଅପରାଧ ଆଡ଼କୁ ଅଙ୍ଗୁଳି ନିର୍ଦ୍ଦେଶ କରୁଛି।
ପ୍ରାଥମିକ ଦୃଷ୍ଟିରୁ ଏହା ଏକ ଲୁଟ୍ ଓ ହତ୍ୟା ମାମଲା ବୋଲି ଅନୁମାନ କରାଯାଉଛି। ଦୁର୍ବୁତ୍ତମାନେ ମହିଳା ଜଣକ ଏକାକୀ ରହୁଥିବାର ସୁଯୋଗ ନେଇ ତାଙ୍କ ଘରେ ପଶିଥିବା ସନ୍ଦେହ କରାଯାଉଛି। ଘରର ଆସବାବପତ୍ର ବିଶୃଙ୍ଖଳିତ ଭାବେ ପଡ଼ିଥିବା ବେଳେ ଗୁରୁତ୍ୱପୂର୍ଣ୍ଣ ସାମଗ୍ରୀ ଚୋରି ହୋଇଥିବା ପରିବାର ଲୋକେ ଅଭିଯୋଗ କରିଛନ୍ତି। ସମ୍ଭବତଃ ଲୁଟ୍ ବେଳେ ବାଧା ଦେବାରୁ ଦୁର୍ବୁତ୍ତମାନେ ସୁଚିତ୍ରାଙ୍କୁ ହତ୍ୟା କରି ଘର ବାହାରେ ଫିଙ୍ଗି ଦେଇ ଫେରାର ହୋଇଯାଇଛନ୍ତି।
ଖବର ପାଇ ଧର୍ମଗଡ଼ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ସାଇଣ୍ଟିଫିକ୍ ଟିମ୍ ଏବଂ ଶ୍ୱାନ ବାହିନୀ ସହାୟତାରେ ପୋଲିସ ଘଟଣାର ଛାନଭିନ୍ ଆରମ୍ଭ କରିଛି। ପଡ଼ୋଶୀ ଏବଂ ସମ୍ପର୍କୀୟମାନଙ୍କୁ ପଚରାଉଚରା କରାଯାଉଛି। ଘରେ ଏକୁଟିଆ ରହୁଥିବା ବୃଦ୍ଧବୃଦ୍ଧାଙ୍କ ସୁରକ୍ଷାକୁ ନେଇ ଏହି ଘଟଣା ଏବେ ପ୍ରଶ୍ନବାଚୀ ସୃଷ୍ଟି କରିଛି। ଏହି ଦୁଃଖଦ ଘଟଣା ପରେ ସମଗ୍ର ଗଡ଼ିଆଜୋର ଗ୍ରାମରେ ଶୋକର ଛାୟା ଖେଳିଯାଇଛି।
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
