ବରିଷ୍ଠ କଂଗ୍ରେସ ନେତା ତଥା ପୂର୍ବତନ କେନ୍ଦ୍ର ଗୃହମନ୍ତ୍ରୀ ଶ୍ରୀ ଶିବରାଜ ପାଟିଲଙ୍କ ଆଜି ୯୦ ବର୍ଷ ବୟସରେ ପରଲୋକ ହୋଇଛି। ଦୀର୍ଘ ଦିନର ଅସୁସ୍ଥତା ହେତୁ ଆଜି ସକାଳ ପ୍ରାୟ ୬.୩୦ ସମୟରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି। ତାଙ୍କ ଦେହାନ୍ତରେ ମହାରାଷ୍ଟ୍ର ସମେତ ସମଗ୍ର ଜାତୀୟ ରାଜନୀତିରେ ଶୋକର ବାତାବରଣ ଖେଳିଯାଇଛି। ସେ ଭାରତୀୟ ରାଜନୀତିରେ ଜଣେ ଶାନ୍ତ, ପରିଶ୍ରମୀ ଏବଂ ମହାନ ବ୍ୟକ୍ତିତ୍ୱ ଭାବରେ ବେଶ ପରିଚିତ ଥିଲେ।
ଶିବରାଜ ପାଟିଲଙ୍କ ରାଜନୈତିକ ଜୀବନ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏବଂ ସୁଦୀର୍ଘ ଥିଲା। ସେ ଭାରତୀୟ ଜାତୀୟ କଂଗ୍ରେସର ଜଣେ ବରିଷ୍ଠ ନେତା ଥିଲେ। ସେ ନିଜର ଦୀର୍ଘ ୪ ଦଶନ୍ଧିରୁ ଅଧିକ ସାଧାରଣ ଜୀବନ ମଧ୍ୟରେ ଅନେକ ଗୁରୁତ୍ୱପୂର୍ଣ୍ଣ ପଦବୀରେ ରହିଥିଲେ, ଯେଉଁଥିରେ ପ୍ରମୁଖ ଥିଲା:
• ସେ ୧୦ମ ଲୋକସଭାର ବାଚସ୍ପତି ଭାବରେ କାର୍ଯ୍ୟ କରିଥିଲେ।
• ସେ କେନ୍ଦ୍ର ମନ୍ତ୍ରିମଣ୍ଡଳରେ କେନ୍ଦ୍ର ଗୃହମନ୍ତ୍ରୀ ସମେତ ଅନେକ ଗୁରୁତ୍ୱପୂର୍ଣ୍ଣ ବିଭାଗର ମନ୍ତ୍ରୀ ଦାୟିତ୍ୱ ତୁଲାଇଥିଲେ।
• ସେ ୭ ଥର ମହାରାଷ୍ଟ୍ରର ଲାତୁର ଲୋକସଭା ଆସନରୁ ବିଜୟୀ ହୋଇଥିଲେ।
• ସେ ମହାରାଷ୍ଟ୍ର ବିଧାନସଭାରେ ମଧ୍ୟ ଦାୟିତ୍ୱ ତୁଲାଇଥିଲେ।
ସେ ୧୯୩୫ ମସିହା ଅକ୍ଟୋବର ୧୨ ତାରିଖରେ ମହାରାଷ୍ଟ୍ରର ଲାତୁର ଜିଲ୍ଲାର ଚକୁର ଗ୍ରାମରେ ଜନ୍ମଗ୍ରହଣ କରିଥିଲେ। ସଂସଦ, କେନ୍ଦ୍ର ସରକାର ଏବଂ ରାଜ୍ୟ ବିଧାନସଭାରେ ତାଙ୍କର ପ୍ରଭାବଶାଳୀ ଯୋଗଦାନ ପାଇଁ ସେ ସର୍ବଦା ସ୍ମରଣୀୟ ହୋଇ ରହିବେ।
ଶିବରାଜ ପାଟିଲଙ୍କ ଦେହାନ୍ତରେ ଦେଶର ବହୁ ବରିଷ୍ଠ ନେତା ଶୋକ ପ୍ରକାଶ କରିଛନ୍ତି।
• ଏକ ଟ୍ୱିଟ୍ ମାଧ୍ୟମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୋକ ପ୍ରକାଶ କରି କହିଛନ୍ତି ଯେ, “ଶ୍ରୀ ଶିବରାଜ ପାଟିଲଙ୍କ ଦେହାନ୍ତରେ ମୁଁ ଦୁଃଖିତ। ସେ ଜଣେ ଅଭିଜ୍ଞ ନେତା ଥିଲେ ଏବଂ ସାଧାରଣ ଜୀବନରେ ଦୀର୍ଘ ବର୍ଷ ଧରି ବିଭିନ୍ନ ଗୁରୁତ୍ୱପୂର୍ଣ୍ଣ ପଦବୀରେ କାର୍ଯ୍ୟ କରିଥିଲେ।” ପ୍ରଧାନମନ୍ତ୍ରୀ ଏହି ଦୁଃଖଦ ସମୟରେ ତାଙ୍କ ପରିବାର ପ୍ରତି ସମବେଦନା ଜଣାଇଛନ୍ତି।
• ଡିଫେନ୍ସ ମିନିଷ୍ଟର୍ ରାଜନାଥ ସିଂହ ଶୋକ ପ୍ରକାଶ କରି କହିଛନ୍ତି ଯେ, “ଶିବରାଜ ପାଟିଲ ଜଣେ ଅନୁଭବୀ ନେତା ଥିଲେ, ଯିଏ ଦେଶକୁ ବିଭିନ୍ନ ଭୂମିକାରେ ସେବା ଦେଇଛନ୍ତି ଏବଂ ଭାରତର ଉନ୍ନତି ପାଇଁ ପ୍ରଭାବଶାଳୀ ଯୋଗଦାନ କରିଛନ୍ତି। ଏହି ଦୁଃଖଦ ସମୟରେ ତାଙ୍କ ପରିବାର ପ୍ରତି ମୋର ସମବେଦନା।”
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
