ଡିୱାଇ ପାଟିଲ ଷ୍ଟାଡିୟମରେ ଗ୍ରାଣ୍ଡ୍ ଏନଗେଜମେଣ୍ଟ, ପରେ ହାଇଫାଇ ୱେଡ୍ଡିଂ ସେରିମନି, ଆଉ ଠିକ୍ ବାହାଘର ରାତିରେ ଅନିର୍ଦ୍ଦିଷ୍ଟ କାଳ ଯାଏଁ ଘୁଞ୍ଚିଗଲା ବିବାହ । ଫିଲ୍ମ ଷ୍ଟାଇଲରେ ଏପରି ବିବାହ ପୋଷ୍ଟପୋନକୁ ନେଇ ସବୁଠି ଚର୍ଚ୍ଚା । ଏ ବିବାହ ସମାରୋହ ଚାଲିଥିଲା କ୍ରିକେଟର୍ ସ୍ମୃତି ମାନ୍ଧାନା ଓ ମ୍ୟୁଜିକ୍ କମ୍ପୋଜର ପଲାଶ ମୁଚ୍ଛଲଙ୍କର । କିନ୍ତୁ ହଠାତ୍ ବିବାହ ଘୁଞ୍ଚିଯିବାକୁ ନେଇ ନାନା ଚର୍ଚ୍ଚା ହେଉଛି ।
ସୋଶାଲ ମିଡିଆରେ ସ୍ମୃତି ମାନ୍ଧାନା ଓ ପଲାଶ ମୁଚ୍ଛଲ ଟ୍ରେଣ୍ଡ୍ କରୁଛି । ପଲାଶ ସ୍ମୃତିଙ୍କୁ ଧୋକା ଦେଇଥିବା ଚର୍ଚ୍ଚା କରୁଛନ୍ତି ନେଟିଜେନ୍ସ । ଜଣେ ସୋଶାଲ ମିଡିଆ ୟୁଜର୍ କହିଛନ୍ତି, ପ୍ରଥମେ ବାପାଙ୍କୁ ହୃଦଘାତ ଆସିବା, ପରେ ପଲାଶ ମୁଚ୍ଛଲ ଅସୁସ୍ଥ ଥିବା ଚର୍ଚ୍ଚା ଆଉ ପରେ ସ୍ମୃତି ମାନ୍ଧାନା ନିର୍ବନ୍ଧ, ହଳଦୀ ଓ ମେହେନ୍ଦିର ସବୁ ପୋଷ୍ଟ୍ ଡିଲିଟ୍ କରିଦେବା ସନ୍ଦେହ ସୃଷ୍ଟି କରୁଛି । ପୂରା ସିନ୍ ପଛରେ କିଛି ସତ ଲୁଚିଥିବା ସନ୍ଦେହ କରୁଛନ୍ତି ନେଟିଜେନ୍ସ ।
ପ୍ରକାଶ ଥାଉ କି, ପଲାଶ ଓ ସ୍ମୃତି ଦୀର୍ଘ ଦିନ ଧରି ଡେଟିଂ କରିଥିଲେ । ଉଭୟଙ୍କ ରିଲେସନସିପ୍ ଲାଇମଲାଇଟରେ ଥିଲା । ନିକଟରେ ଭାରତୀୟ ମହିଳା ଟିମ୍ ବିଶ୍ୱକପ୍ ଜିତିବା ପରେ ପଲାଶ ସ୍ମୃତିଙ୍କୁ ପ୍ରପୋଜ୍ କରିଥିଲେ । ସ୍ମୃତି ଫାଇନାଲ୍ ଖେଳିଥିବା ଡିୱାଇ ଷ୍ଟାଡିୟମରେ ହିଁ ପ୍ରୋପଜ୍ କରିଥିଲେ ପଲାଶ, ଏହିଠାରେ ହିଁ ଉଭୟଙ୍କର ରିଙ୍ଗ୍ ସେରିମନି ହୋଇଥିଲା । ଫିଲ୍ମ ଷ୍ଟାଇଲରେ ପଲାଶ ସ୍ମୃତିଙ୍କ ଆଖିରେ ପଟି ବାନ୍ଧି ଷ୍ଟାଡିୟମକୁ ଆଣିଥିଲେ, ଆଉ ସେଠାରେ ଆଣ୍ଠୁମାଡ଼ି ତାଙ୍କୁ ବିବାହ ପାଇଁ ମଞ୍ଜୁରୀ ମାଗିଥିଲେ । ଏହି ସମୟର ଭିଡିଓ ସୋଶାଲ ମିଡିଆରେ ଖୁବ୍ ଭାଇରାଲ୍ ହୋଇଥିଲା ।
ଏହାର ଦୁଇ ଦିନ ପରେ ଆରମ୍ଭ ହୋଇଥିଲା ଗ୍ରାଣ୍ଡ୍ ୱେଡ୍ଡିଂ ସେରିମନି । ବହୁ ନାମିଦାମୀ ବଲିଉଡ ଷ୍ଟାର୍ ଓ କ୍ରିକେଟର ଯୋଗ ଦେଇଥିଲେ । ହଳଦୀଠୁ ସଙ୍ଗୀତ, ମେହେନ୍ଦି ସବୁ ସେରିମନି ହୋଇଥିଲା । ଖୁସି ମୁହୂର୍ତ୍ତର ଏକାଧିକ ଫଟୋ ପୋଷ୍ଟ କରିଥିଲେ ସ୍ମୃତି । ମାତ୍ର ଠିକ୍ ବାହାଘର ଦିନ ଶୁଭ ମୁହୂରତର କିଛି ଘଣ୍ଟା ପୂର୍ବରୁ ବିବାହ ଘୁଞ୍ଚାଇ ଦିଆ ଯାଇଥିଲା । ସ୍ମୃତିଙ୍କ ମ୍ୟାନେଜରଙ୍କ କହିବା ଅନୁସାରେ, ତାଙ୍କ ବାପା ହଠାତ୍ ଅସୁସ୍ଥ ହୋଇ ପଡ଼ିବାରୁ ବର୍ତ୍ତମାନ ସ୍ମୃତି ବିବାହ କରିବେ ନାହିଁ । ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ବିବାହ ଘୁଞ୍ଚାଇ ଦିଆଯାଇଛି ।
ତେବେ ସୋଶାଲ ମିଡିଆରେ ଚାଲିଥିବା ଚର୍ଚ୍ଚାକୁ ନେଇ ପଲାଶ କି ସ୍ମୃତି ମୁହଁ ଖୋଲି ନାହାନ୍ତି । ସ୍ମୃତିଙ୍କ ମ୍ୟାନେଜର କିମ୍ବା ପରିବାରବର୍ଗ ଏନେଇ କୌଣସି ସ୍ମପଷ୍ଟୀକରଣ ଦେଇନାହାନ୍ତି । ସେପଟରେ ପଲାଶ ଇନଷ୍ଟାଗ୍ରାମରେ ମଧ୍ୟ ନିର୍ବନ୍ଧର ଭିିଡିଓ ଅଛି । ସେ ସ୍ମୃତିଙ୍କ ସହ କୌଣସି ଫଟୋ ଡିଲିଟ୍ କରିନାହାନ୍ତିି । ତେବେ ଅଚାନକ ବିବାହ ଘୁଞ୍ଚିବାର କାରଣ କଣ ହୋଇପାରେ, ତାହା ଏଯାଏଁ ସ୍ପଷ୍ଟ ହୋଇନାହିଁ । ଆଗକୁ ଏହି ଫେମସ୍ ଯୋଡ଼ିଙ୍କ ବିବାହ କେବେ ହେଉଛି ଦେଖିବାକୁ ବାକି ରହିଲା ।
Author: Debibandita Barick
ଭାରତୀୟ ଜନ ସଂଚାର ସଂସ୍ଥାନ(IIMC) ଢେଙ୍କାନାଳରୁ ସାମ୍ବାଦିକତା ପାଠ୍ୟକ୍ରମ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାନରେ କାମ କରିଛନ୍ତି। ରାଜନୀତି, ବିଜ୍ଞାନ, କ୍ରୀଡା, ମନୋରଞ୍ଜନ ଓ ସ୍ପେଶଲ ଷ୍ଟୋରୀ ଲେଖିବାରେ ବିଶେଷ ରୁଚି ଓ ଅଭିଜ୍ଞତା ରହିଛି।
