ବିଜେଡିର ମାନସ ମନ୍ଥନ। ନୂଆପଡ଼ା ଉପନିର୍ବାଚନ ଫଳାଫଳ ପରେ ପ୍ରଥମ ଥର ପାଇଁ ବିଜେଡିର ବଡ଼ ବୈଠକ। ନବୀନ ନିବାସରେ ହେଭିୱେଟଙ୍କୁ ନେଇ ଦଳ ସୁପ୍ରିମୋ ନବୀନ ପଟ୍ଟନାୟକଙ୍କ ରୁଦ୍ଧାଦ୍ୱାର ଆଲୋଚନା । ଚର୍ଚ୍ଚା, ଆଲୋଚନାର ଅବସାନ ଘଟାଇ ଦଳକୁ ମଜଭୁତ କରିବା ସହ ପୂର୍ବ ସ୍ଥିତି ଫେରାଇ ଆଣିବା ଉପରେ ଗୁରୁତ୍ଵ । ସେହି ବିଶ୍ବାସ, ବିକାଶର ବାର୍ତ୍ତାକୁ ଲୋକଙ୍କ ଭିତରେ ଉଜ୍ଜୀବିତ ରଖିବାକୁ ପ୍ରୟାସ । ସେଥିପାଇଁ ଦଳ ଚଳାଇଛି କସରତ । ଦଳର ବରିଷ୍ଠ, ଅଭିଜ୍ଞ, ଅନୁଭବୀ ଓ ଆଗାମୀ ପିଢ଼ିକୁ ଆଗକୁ ନେବା ନେତାଙ୍କୁ ନେଇ ଆଲୋଚନା । ରାଜନୈତିକ ବ୍ୟାପାର କମିଟି ସଦସ୍ୟଙ୍କୁ ନେଇ ବିସ୍ତୃତ ଆଲୋଚନା । ଯାହା ନିଷ୍କର୍ଷ ବାହାରିବ ସେହି ଅନୁସାରେ କାର୍ଯ୍ୟ କରିବେ ନେତା ଓ କର୍ମୀ । ତେବେ ସମସ୍ତଙ୍କ ନଜର ବୈଠକର ଆଲୋଚନାକୁ ନେଇ ।
ସୂତ୍ର ଅନୁସାରେ ନୂଆପଡା ଫଳାଫଳକୁ ଅତି ଗୁରୁତ୍ଵର ସହ ଗ୍ରହଣ କରିଛି ଦଳ । ଗତ ୨୪ ବର୍ଷ ଧରି ଏକ ନମ୍ବର ରେ ଥିବା ଦଳ କେମିତି ତିନି ନମ୍ବରକୁ ଖସିଲା । ଲୋକଙ୍କ ବଳ କୁହାଯାଉଥିବା ଦଳ ଦୁର୍ବଳ ହେଉଛି କି?। ଦଳର ଶୋଚନୀୟ ପରାଜୟ ଓ ତିନି ନମ୍ବରକୁ ଖସିବା ପଛର କାରଣକୁ ନେଇ ଆଲୋଚନା ଓ ପର୍ଯ୍ୟଲୋଚନ ହୋଇପାରେ । ନୂଆପଡ଼ା ପରାଜୟ କାରଣକୁ ଆନାଲିସିସ କରାଯିବା ନେଇ ଚର୍ଚା । ସେହିପରି ନୂଆପଡା ଫଳାଫଳକୁ ନେଇ ନେତାଙ୍କ ଅସନ୍ତୋଷ ପରେ ସ୍ନେହାଙ୍ଗିନୀ ଛୁରିଆ ଗଣମାଧ୍ୟମରେ ପ୍ରତିକ୍ରିୟା ରଖିଥିଲେ । ସେ କହିଥିଲେ ଏ ନେଇ ଦଳ ହାଇକୋର୍ଟକୁ ଯିବ ହେଲେ ନିଷ୍ପତ୍ତି ନେବେ ନବୀନ । ଏହା ଉପରେ ମଧ୍ୟ ଆଲୋଚନା ନେଇ ସୂତ୍ରରୁ ସୂଚନା ।
ନବୀନଙ୍କ ଭାବମୂର୍ତ୍ତି ରଖିବାରେ ସ୍ଵତନ୍ତ୍ର ରଣନୀତି ଉପରେ ହୋଇପାରେ ଆଲୋଚନା । ଏହା ଉପରେ ବିଚାର ବିମର୍ଷ । ଦଳର ନୂଆ ନେତୃତ୍ଵ ଓ ନୂଆ ଏଣ୍ଟ୍ରିକୁ ବି ନେଇ ଚର୍ଚ୍ଚା ଜୋର ଧରିଛି । ଶୁଣାଯାଉଛି ଦଳ କାହାକୁ ଦାୟିତ୍ବ ଦେଇପାରେ । ନେତୃତ୍ୱରେ ହୋଇପାରେ ଅଦଳବଦଳ । ନବୀନଙ୍କ ପରେ କିଏ ଧରିବ ମଙ୍ଗ, କିଏ ହେବ ବିଜେଡିର ଉତ୍ତରାଧିକାରୀ ଏ ପ୍ରସଙ୍ଗ ବି ବୈଠକରେ ଉଠିପରେ । ଏହି ପରିପ୍ରେକ୍ଷୀରେ ଗତ କିଛିଦିନ ହେବ ଚାକିରିରୁ ଅବସର ନେଇ ଚର୍ଚ୍ଚାରେ ଥିବା ସୁଜାତା କାର୍ତ୍ତିକେୟନଙ୍କ ଏଣ୍ଟ୍ରିକୁ ନେଇ ଚର୍ଚ୍ଚା ଜୋର ଧରିଛି ।
ଅନ୍ୟପଟେ ଦଳ ବିରୋଧୀ ମନ୍ତବ୍ୟ, ଅସନ୍ତୋଷକୁ କେମିତି ନିୟନ୍ତ୍ରଣ କରିବେ ସେ ନେଇ ହୋଇପାରେ ପୁଙ୍ଖାନୁପୁଙ୍ଖ ଆଲୋଚନା । ସୋସିଆଲ ମିଡିଆରେ କିଛି ନେତା ଯାହା ମନ ଇଚ୍ଛା ଲେଖୁଛନ୍ତି ସେମାନଙ୍କ ଉପରେ ନିୟନ୍ତ୍ରଣ ରଖିବା ନେଇ ହୋଇପାରେ ଆଲୋଚନା । ତେବେ ସବୁଠୁ ବଡ଼ କଥା ହେଉଛି ଆଗକୁ ଆସୁଛି ବିଧାନସଭା ଶୀତକାଳୀନ ଅଧିବେଶନ। ନଭେମ୍ବର ୨୭ରୁ ଆରମ୍ଭ ହେବାକୁ ଥିବା ଅଧିବେଶନ ଡିସେମ୍ବର ୩୧ଯାଏ ଚାଲିବ। ବିଧାନସଭାରେ କଣ ରହିବ ରଣ, ଗୃହରେ କେଉଁ ପ୍ରସଙ୍ଗ ଉଠାଇବେ ତା ଉପରେ ଆଲୋଚନା । ତେବେ ରାଜ୍ୟସଭା ନିର୍ବାଚନ, ପ୍ରାର୍ଥୀ ଚୟନ ଉପରେ ବୈଠକରେ ଆଲୋଚନାର ମୂଳଦୁଆ ପଡିପାରେ ବୋଲି ରାଜନୀତି ସମୀକ୍ଷକଙ୍କ ଆକଳନ ।
Author: Hindustan Tales Odisha
Hindustan Tales Odisha brings you the latest news, Breaking News from Odisha, India and around the world.Stay informed with breaking News,24*7 Updates.
