ସମ୍ଭାବ୍ୟ ବାତ୍ୟାର ଭୟ ଏବଂ ଅନିଶ୍ଚିତତା ମଧ୍ୟରେ ଆସନ୍ତାକାଲିଠାରୁ ରାଜ୍ୟରେ ଆରମ୍ଭ ହେବାକୁ ଯାଉଛି ଧାନ କିଣା ପ୍ରକ୍ରିୟା। ଓଡ଼ିଶାର ଚାଷୀମାନଙ୍କୁ ଉପଯୁକ୍ତ ମୂଲ୍ୟ ଯୋଗାଇ ଦେବା ପାଇଁ ରାଜ୍ୟ ସରକାର ସମସ୍ତ ପ୍ରସ୍ତୁତି ଶେଷ କରିଛନ୍ତି। ସମବାୟ ମନ୍ତ୍ରୀଙ୍କ ସୂଚନାନୁସାରେ, ଗତ ବର୍ଷ ତୁଳନାରେ ଚଳିତ ବର୍ଷ ରାଜ୍ୟ ସରକାର ଧାନ କିଣା ପାଇଁ ଅଧିକ ଲକ୍ଷ୍ୟ ରଖିଛନ୍ତି, ଯାହା ଚାଷୀମାନଙ୍କ ପାଇଁ ଏକ ଶୁଭ ସଙ୍କେତ।
ଚଳିତ ବର୍ଷର ଧାନ କିଣା କାର୍ଯ୍ୟକ୍ରମକୁ ସୁରୁଖୁରୁରେ ପରିଚାଳନା କରିବା ପାଇଁ ମଣ୍ଡିଗୁଡ଼ିକରେ ବିଶେଷ ବ୍ୟବସ୍ଥା କରାଯାଇଛି। ବାତ୍ୟା ଓ ବର୍ଷାଜନିତ ସମସ୍ୟାକୁ ଦୃଷ୍ଟିରେ ରଖି ଚାଷୀମାନେ ଯେପରି କୌଣସି ଅସୁବିଧାର ସମ୍ମୁଖୀନ ନ ହୁଅନ୍ତି, ସେଥିପ୍ରତି ଅଧିକ ଗୁରୁତ୍ୱ ଦିଆଯାଇଛି। ସମସ୍ତ ଅଧିକାରୀଙ୍କୁ ଧାନ କିଣା ପ୍ରକ୍ରିୟା ଉପରେ ତୀକ୍ଷ୍ଣ ନଜର ରଖିବାକୁ ନିର୍ଦ୍ଦେଶ ଦିଆଯାଇଛି। ମଣ୍ଡି ଖୋଲିବା ପରେ କୌଣସି ସ୍ଥାନରେ ଯଦି କିଛି ସମସ୍ୟା କିମ୍ବା ଅସୁବିଧା ଦେଖାଯାଏ, ତେବେ ତାହାକୁ ତୁରନ୍ତ ସେହି ସ୍ଥାନରେ ହିଁ ସମାଧାନ କରିବାକୁ ନିର୍ଦ୍ଦେଶ ଜାରି ହୋଇଛି। ଏହା ଦ୍ୱାରା ଚାଷୀମାନେ ଶୀଘ୍ର ଓ ସହଜରେ ସେମାନଙ୍କ ଧାନ ବିକ୍ରି କରିପାରିବେ।
ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ‘କଟଣି ଛଟଣି’ ଉପରେ ରାଜ୍ୟ ସରକାର କଡ଼ା ନଜର ରଖିଛନ୍ତି। ଚାଷୀଙ୍କଠାରୁ ଧାନ କିଣିବା ସମୟରେ ଅଯଥା ଓଜନ କଟାଯିବା ଅଭିଯୋଗକୁ ଏଡ଼ାଇବା ପାଇଁ ପ୍ରଶାସନ ସଜାଗ ରହିଛି। ତେବେ ମନ୍ତ୍ରୀ ସ୍ପଷ୍ଟ କରିଛନ୍ତି ଯେ, ଯଦି କୌଣସି କ୍ଷେତ୍ରରେ ଚାଷୀ ଏବଂ ମିଲରଙ୍କ ମଧ୍ୟରେ ସଲାସୁତୁରା ହୋଇ ସ୍ୱଇଚ୍ଛାରେ କଟଣି ଛଟଣି କରାଯାଏ, ତେବେ ସେଥିରେ ରାଜ୍ୟ ସରକାରଙ୍କ କୌଣସି ହସ୍ତକ୍ଷେପ ରହିବ ନାହିଁ। ଏହି ପ୍ରକାରର କାର୍ଯ୍ୟକଳାପ ରାଜ୍ୟ ସରକାରଙ୍କ କର୍ତ୍ତୃତ୍ୱ ବାହାରେ। କିନ୍ତୁ କୌଣସି ଅଧିକାରୀଙ୍କ ଦ୍ୱାରା ଚାଷୀଙ୍କୁ ବାଧ୍ୟତାମୂଳକ କଟଣି ଛଟଣି କରାଗଲେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ତେଣୁ, ଚଳିତ ବର୍ଷର ଧାନ କିଣା ପ୍ରକ୍ରିୟା ପୂର୍ବ ଅପେକ୍ଷା ଅଧିକ ସ୍ୱଚ୍ଛ ଓ ଚାଷୀ-ଅନୁକୂଳ ହେବ ବୋଲି ଆଶା କରାଯାଉଛି।
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
