ଭୁବନେଶ୍ୱର: ଘରୋଇ ଡାକ୍ତରଖାନା ଗୁଡ଼ିକରେ କ୍ୟାଶ୍ଲେସ୍ ଚିକିତ୍ସା ସେବା ପ୍ରଦାନରେ ତ୍ରୁଟି ଏବଂ ରୋଗୀଙ୍କଠାରୁ ମନମୁଖୀ ଭାବେ ଅଧିକ ଅର୍ଥ ଆଦାୟ (Exorbitant Billing) ଅଭିଯୋଗକୁ ଓଡ଼ିଶା ସରକାର ଅତ୍ୟନ୍ତ ଗୁରୁତ୍ୱର ସହ ନେଇଛନ୍ତି। ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରୀ ମୁକେଶ ମହାଲିଙ୍ଗ ବିଧାନସଭାରେ ଏକ ଲିଖିତ ଉତ୍ତର ମାଧ୍ୟମରେ ଏହି ସୂଚନା ଦେଇଛନ୍ତି ଯେ, ଅଭିଯୋଗ ଆଧାରରେ ୪ଟି ବଡ଼ ହସ୍ପିଟାଲ୍ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଆରମ୍ଭ ହୋଇଛି।
ବିଧାୟକ ଅରବିନ୍ଦ ମହାପାତ୍ର ପ୍ରାଇଭେଟ୍ ହସ୍ପିଟାଲ୍ଗୁଡ଼ିକ ଦ୍ୱାରା କ୍ୟାଶ୍ଲେସ୍ ସେବା ଦେବାରେ ଅମଙ୍ଗ ହେବା ଏବଂ ରୋଗୀଙ୍କଠାରୁ ଅଯଥା ଅଧିକ ଶୁଳ୍କ ଆଦାୟ କରିବା ସମ୍ପର୍କରେ ସରକାରଙ୍କୁ ସ୍ପଷ୍ଟୀକରଣ ମାଗିଥିଲେ। ଏହାର ଉତ୍ତରରେ ମନ୍ତ୍ରୀ ମହାଲିଙ୍ଗ ଜଣାଇଥିଲେ ଯେ ଯାଞ୍ଚ ହୋଇଥିବା ଅଭିଯୋଗ ଆଧାରରେ ତୁରନ୍ତ କାର୍ଯ୍ୟାନୁଷ୍ଠାନ ଆରମ୍ଭ କରାଯାଇଛି।
୪ ହସ୍ପିଟାଲ୍କୁ କାରଣ ଦର୍ଶାଅ ନୋଟିସ୍ ଜାରି:
ମନ୍ତ୍ରୀଙ୍କ ସୂଚନା ଅନୁଯାୟୀ, ଭୁବନେଶ୍ୱରରେ ଥିବା ଚାରୋଟି ବଡ଼ ଘରୋଇ ହସ୍ପିଟାଲ୍ ଯଥା – ସନ୍ ସାଇନ୍ ହସ୍ପିଟାଲ୍, ଆପୋଲୋ ହସ୍ପିଟାଲ୍, ମଣିପାଲ୍ ହସ୍ପିଟାଲ୍, ଏବଂ IMS & SUM ହସ୍ପିଟାଲ୍କୁ ନୋଟିସ୍ ଜାରି କରାଯାଇଛି। ଅଭିଯୋଗ ରହିଛି ଯେ ଏହି ହସ୍ପିଟାଲ୍ଗୁଡ଼ିକ ନିୟମ ଅନୁଯାୟୀ ବାଧ୍ୟତାମୂଳକ ହୋଇଥିଲେ ମଧ୍ୟ କ୍ୟାଶ୍ଲେସ୍ ସେବା ପ୍ରଦାନ କରିବାକୁ ମନା କରିଦେଇଛନ୍ତି ଏବଂ ରୋଗୀଙ୍କୁ ଅତ୍ୟଧିକ ବିଲ୍ ଆଦାୟ କରିଛନ୍ତି।
ମନ୍ତ୍ରୀ ମୁକେଶ ମହାଲିଙ୍ଗ ଗୃହକୁ ଜଣାଇଥିଲେ ଯେ ସମ୍ପୃକ୍ତ ହସ୍ପିଟାଲ୍ଗୁଡ଼ିକୁ ଏହି ଉଲ୍ଲଙ୍ଘନ କାହିଁକି ହେଲା ଏବଂ ସେମାନଙ୍କ ବିରୁଦ୍ଧରେ କାହିଁକି ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରା ନଯିବ, ସେ ନେଇ ସ୍ପଷ୍ଟୀକରଣ ଦେବାକୁ ନିର୍ଦ୍ଦେଶ ଦିଆଯାଇଛି।
ସେ ଦୃଢ଼ତାର ସହ କହିଥିଲେ ଯେ ରାଜ୍ୟ ସରକାର ରୋଗୀଙ୍କ ଅଧିକାରକୁ ପ୍ରଭାବିତ କରୁଥିବା କୌଣସି ପ୍ରକାରର ଅବହେଳା କ୍ଷେତ୍ରରେ ‘ଜିରୋ ଟଲରେନ୍ସ’ (Zero Tolerance) ନୀତି ଆପଣେଇବେ।
ମନ୍ତ୍ରୀ ଆହୁରି ମଧ୍ୟ ସ୍ପଷ୍ଟ କରିଛନ୍ତି ଯେ ଏପରି ଘଟଣାର ଯେପରି ପୁନରାବୃତ୍ତି ନହୁଏ ଏବଂ ରୋଗୀମାନେ ବିନା ଆର୍ଥିକ ବୋଝରେ ନିରବଚ୍ଛିନ୍ନ ଭାବରେ ଡାକ୍ତରୀ ସେବା ପାଇପାରିବେ, ତାହା ସୁନିଶ୍ଚିତ କରିବା ପାଇଁ ନିରନ୍ତର ତଦାରଖ (Continuous Monitoring) ବ୍ୟବସ୍ଥା ଜାରି ରହିଛି।
ଅନ୍ୟପଟେ, ବିଧାୟକଙ୍କ ଦ୍ୱାରା ଉଠାଯାଇଥିବା ଅତ୍ୟଧିକ ମୂଲ୍ୟ ଧାର୍ଯ୍ୟ (Unethical Pricing) ସମ୍ପର୍କରେ ସରକାରଙ୍କୁ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ ଅଭିଯୋଗ ମିଳିନଥିବା ମନ୍ତ୍ରୀ ସ୍ପଷ୍ଟ କରିଥିଲେ।
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
