ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଚାଲିଥିବା ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜର ଦ୍ୱିତୀୟ ମ୍ୟାଚ୍ ଆଜି ଖେଳାଯିବ। ଏହି ଗୁରୁତ୍ୱପୂର୍ଣ୍ଣ ମ୍ୟାଚ୍ ଛତିଶଗଡ଼ର ରାୟପୁର ସ୍ଥିତ ଶହୀଦ୍ ବୀର ନାରାୟଣ ସିଂହ ଅନ୍ତର୍ଜାତୀୟ କ୍ରିକେଟ୍ ଷ୍ଟାଡିୟମରେ ଅନୁଷ୍ଠିତ ହେବ। ପ୍ରଥମ ମ୍ୟାଚ୍ ଜିତି ସିରିଜରେ ୧-୦ରେ ଆଗୁଆ ଥିବା ଟିମ୍ ଇଣ୍ଡିଆ ଆଜି ବିଜୟ ହାସଲ କରି ସିରିଜ୍ କବଜା କରିବା ଲକ୍ଷ୍ୟରେ ପଡ଼ିଆକୁ ଓହ୍ଲାଇବ।
ପ୍ରଥମ ମ୍ୟାଚ୍ ଝାଡ଼ଖଣ୍ଡର ରାଞ୍ଚିରେ ଖେଳାଯାଇଥିଲା, ଯେଉଁଥିରେ ଭାରତୀୟ ଦଳ ଦକ୍ଷିଣ ଆଫ୍ରିକାକୁ ମାତ୍ର ୧୭ ରନରେ ପରାସ୍ତ କରିଥିଲା। ଭାରତୀୟ ଦଳର ବ୍ୟାଟିଂ ବିଭାଗରେ ବିରାଟ କୋହଲି ଏକ ଦମଦାର ଶତକ (୧୩୭ ରନ୍) ଏବଂ ଅଧିନାୟକ ରୋହିତ ଶର୍ମା ଏକ ଦୃଢ଼ ଅର୍ଦ୍ଧଶତକ (୮୮ ରନ୍) ହାସଲ କରିଥିଲେ। ଫଳରେ ଭାରତୀୟ ଦଳ ଧାର୍ଯ୍ୟ ୫୦ ଓଭରରେ ମୋଟ୍ ୩୪୯ ରନ୍ କରିବାକୁ ସକ୍ଷମ ହୋଇଥିଲା। ଏତେ ବଡ଼ ଟାର୍ଗେଟ୍ ଦେବା ପରେ ମଧ୍ୟ ଭାରତର ବିଜୟ ବ୍ୟବଧାନ କମ୍ ରହିବା, ଦକ୍ଷିଣ ଆଫ୍ରିକା ଦଳର ଲଢୁଆ ମନୋଭାବକୁ ଦର୍ଶାଉଛି।ତେବେ, ଆଜିର ମ୍ୟାଚ୍ରେ ଦୁଇ ଦଳ ମଧ୍ୟରେ ଏକ କଡ଼ା ଟକ୍କର ଦେଖିବାକୁ ମିଳିପାରେ ବୋଲି ଆଶା କରାଯାଉଛି।
ଦଳର ଅଭିଜ୍ଞ ବ୍ୟାଟ୍ସମ୍ୟାନ୍ କୋହଲି ଓ ରୋହିତ ଶର୍ମାଙ୍କ ଦମଦାର ଫର୍ମ ଯୋଗୁଁ ଆଜିର ମ୍ୟାଚରେ ଭାରତର ପଲ୍ଲା ଭାରୀ ରହିଛି। କିନ୍ତୁ, ଟିମ୍ ଇଣ୍ଡିଆ ପାଇଁ ଚିନ୍ତାର ବିଷୟ ହେଉଛି ଯେ ଆହତ କାରଣରୁ ପ୍ରଥମ ମ୍ୟାଚରେ ଖେଳିପାରି ନଥିବା ଓପନର୍ ଶୁଭମନ ଗିଲ୍ ଆଜି ମଧ୍ୟ ଦ୍ୱିତୀୟ ଦିନିକିଆରୁ ବାଦ୍ ପଡ଼ିଛନ୍ତି। ଫଳରେ, ଲୋକେଶ ରାହୁଲଙ୍କ ଅଧିନାୟକତ୍ୱରେ ଟିମ୍ ଇଣ୍ଡିଆ ଆଜି ମ୍ୟାଚ୍ ଖେଳିବ। ରାହୁଲଙ୍କ ପାଇଁ ଏହା ଏକ ଗୁରୁତ୍ୱପୂର୍ଣ୍ଣ ସୁଯୋଗ, କାରଣ ତାଙ୍କ ଅଧିନାୟକତ୍ୱରେ ଭାରତ ଆଜି ସିରିଜ୍ ଜିତିବା ପାଇଁ ସବୁ ପ୍ରକାର ଚେଷ୍ଟା କରିବ।
ଅପରପକ୍ଷରେ, ଦକ୍ଷିଣ ଆଫ୍ରିକା ଦଳ ପାଇଁ ଖୁସିର ଖବର ହେଉଛି ଯେ ଅଧିନାୟକ ଟେମ୍ବା ବାଭୁମା ଏବଂ ପ୍ରମୁଖ ସ୍ପିନର କେଶବ ମହାରାଜ ଦଳକୁ ଫେରିଛନ୍ତି। ଏହି ଦୁଇ ପ୍ରମୁଖ ଖେଳାଳିଙ୍କ ଫେରିବା ଦ୍ୱାରା ଦକ୍ଷିଣ ଆଫ୍ରିକା ଦଳର ଶକ୍ତି ବୃଦ୍ଧି ପାଇଛି। କ୍ରିକେଟ୍ ସମୀକ୍ଷକଙ୍କ ମତରେ, ଏହି ଦୁଇ ଖେଳାଳିଙ୍କ ଉପସ୍ଥିତିରେ ଭ୍ରମଣକାରୀ ଦଳ ପୂର୍ବ ଅପେକ୍ଷା ଆହୁରି ଭଲ ପ୍ରଦର୍ଶନ କରିବାକୁ ଆଶାବାଦୀ ଅଛି। ତେଣୁ, ଆଜିର ମ୍ୟାଚ୍ ଦୁଇ ଦଳ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହେବା ସହିତ ଦର୍ଶକମାନେ ଏକ ରୋମାଞ୍ଚକର ମୁକାବିଲା ଦେଖିବେ ବୋଲି ଆଶା କରାଯାଉଛି।
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
