ଭୁବନେଶ୍ୱର: ଦୀର୍ଘ ଦିନରୁ ବକେୟା ଥିବା ନିଜର ଦୁଇ ଦଫା ଦାବି ପୂରଣ ପାଇଁ ଓଡ଼ିଶାର ପ୍ରାଥମିକ ଶିକ୍ଷକମାନେ ଏକ ଭିନ୍ନ ଓ ଅଭିନବ ଢ଼ଙ୍ଗରେ ରାଜରାସ୍ତାକୁ ଓହ୍ଲାଇଛନ୍ତି । ସ୍ଥାୟୀ ଚାକିରୀ ମାନ୍ୟତା ଏବଂ ୪୨୦୦ ଟଙ୍କା ଗ୍ରେଡ୍ ପେ’ ଦାବିରେ ଶିକ୍ଷକମାନେ ବିଧାନସଭା ସମ୍ମୁଖରେ ଦୀପ ଜାଳି, ଧୂପକାଠି ଲଗାଇ ଏକ ପ୍ରତୀକାତ୍ମକ ‘ପୂଜା’ କରି ପ୍ରତିବାଦ ଜଣାଇଛନ୍ତି । ସରକାରଙ୍କ ଦୃଷ୍ଟି ଆକର୍ଷଣ କରିବା ଉଦ୍ଦେଶ୍ୟରେ, ସେମାନେ ନିଜେ ଭକ୍ତ ଓ ନିଜେ ପୂଜକ ସାଜି ରାସ୍ତା ମଝିରେ କଳସ ବସାଇ ଭଗବାନଙ୍କ ନିକଟରେ ନିଜର ଦୁଃଖ ଜଣାଉଥିବା କହିଛନ୍ତି ।
ପ୍ରାଥମିକ ଶିକ୍ଷକ ମହାସଂଘ (ଏନ୍ପିଏସ୍) ର ଆହ୍ୱାନରେ ରାଜ୍ୟର ସମସ୍ତ ଜିଲ୍ଲାରୁ ହଜାର ହଜାର ଶିକ୍ଷକ ଓ ଶିକ୍ଷୟିତ୍ରୀ ଭୁବନେଶ୍ୱରରେ ଏକାଠି ହୋଇ ଗତକାଲି ଠାରୁ ଅହୋରାତ୍ର ଧାରଣା ଦେଇଛନ୍ତି ।
ସେମାନଙ୍କର ପ୍ରମୁଖ ଦାବି ଦୁଇଟି ହେଲା:
• ୨୦୦୧ରୁ ଏପର୍ଯ୍ୟନ୍ତ କାର୍ଯ୍ୟରତ ସମସ୍ତ ପ୍ରାଥମିକ ଶିକ୍ଷକ (ଏନ୍ପିଏସ୍ ବର୍ଗ)ଙ୍କ ଠିକା ଅବଧିକୁ ତୁରନ୍ତ ନିୟମିତ ମାନ୍ୟତା ଦେବା ସହ ନୋସନାଲ ଇନ୍କ୍ରିମେଣ୍ଟ ପ୍ରଦାନ କରାଯାଉ ।
• ପଦବୀକୁ ଅପଗ୍ରେଡ୍ କରି ଲେବୁଲ୍-୨ ଅନୁଯାୟୀ ୩୫,୪୦୦ ଟଙ୍କା ହାରରେ ୪୨୦୦ ଟଙ୍କା ଗ୍ରେଡ୍ ପେ’ ପ୍ରଦାନ କରାଯାଉ ।
ଶିକ୍ଷକମାନେ ଚେତାବନୀ ଦେଇଛନ୍ତି ଯେ, ଯେପର୍ଯ୍ୟନ୍ତ ଦାବି ପୂରଣ ନ ହୋଇଛି, ସେମାନେ ସମୂହ ଛୁଟିରେ ରହି ଆନ୍ଦୋଳନ ଜାରି ରଖିବେ ଏବଂ ସ୍କୁଲ୍ ଫେରିବେ ନାହିଁ ।
ଅନ୍ୟପଟେ, ଶିକ୍ଷକ ଆନ୍ଦୋଳନ କାରଣରୁ ରାଜ୍ୟର ବିଭିନ୍ନ ସ୍କୁଲରେ ପିଲାଙ୍କ ପାଠପଢ଼ା ବାଧାପ୍ରାପ୍ତ ହୋଇଛି । ଏହି ପରିପ୍ରେକ୍ଷୀରେ ଗଣଶିକ୍ଷା ମନ୍ତ୍ରୀ ଶିକ୍ଷକମାନଙ୍କୁ ଆନ୍ଦୋଳନରୁ ଓହରିଯିବା ପାଇଁ ଅନୁରୋଧ କରିଛନ୍ତି । ମନ୍ତ୍ରୀ କହିଛନ୍ତି ଯେ, ସରକାର ଶିକ୍ଷକମାନଙ୍କ ସହ ଅଛନ୍ତି ଏବଂ ସେମାନଙ୍କ ଦାବି ପୂରଣ ନେଇ ସକାରାତ୍ମକ ଭାବେ ବିଚାର କରୁଛନ୍ତି । ଶିକ୍ଷକମାନେ ସହଯୋଗ କରି ତୁରନ୍ତ ଶ୍ରେଣୀଗୃହକୁ ଫେରି ପାଠପଢ଼ା କାର୍ଯ୍ୟ ଆରମ୍ଭ କରନ୍ତୁ ବୋଲି ସେ ନିବେଦନ କରିଛନ୍ତି । ତେବେ, ଏପର୍ଯ୍ୟନ୍ତ ସରକାରଙ୍କ ପକ୍ଷରୁ ଆନୁଷ୍ଠାନିକ ଭାବେ କୌଣସି ଆଲୋଚନା ହୋଇନାହିଁ ।
ନୀତି ଉଲ୍ଲଂଘନ ଅଭିଯୋଗ:
ପ୍ରାଥମିକ ଶିକ୍ଷକ ମହାସଂଘ ଅଭିଯୋଗ କରିଛି ଯେ, ଦେଶର ୨୨ଟି ରାଜ୍ୟରେ ପ୍ରାଥମିକ ଶିକ୍ଷକଙ୍କୁ ୩୫,୪୦୦ ଟଙ୍କା ବା ତା’ଠାରୁ ଅଧିକ ଏବଂ ୪୨୦୦ ଟଙ୍କା ଗ୍ରେଡ୍ ପେ’ ମିଳୁଥିବା ବେଳେ ଓଡ଼ିଶା ସରକାର ସର୍ବନିମ୍ନ ଦରମା (୫୨୦୦ ଟଙ୍କା ଓ ୨୨୦୦ ଟଙ୍କା ଗ୍ରେଡ୍ ପେ’) ଦେଉଛନ୍ତି ।
ସେମାନେ ଆହୁରି ମଧ୍ୟ ଅଭିଯୋଗ କରିଛନ୍ତି ଯେ, ରାଜ୍ୟ ସରକାରଙ୍କ ଅଧୀନରେ ଥିବା ଅନ୍ୟ ବିଭାଗରେ ଯୁକ୍ତ ଦୁଇ (CT) ଯୋଗ୍ୟତାଧାରୀ କର୍ମଚାରୀଙ୍କୁ ଉନ୍ନତ ଦରମା ଏବଂ ୧୦ ବର୍ଷ କାର୍ଯ୍ୟ ପରେ ୪୨୦୦ ଟଙ୍କା ଗ୍ରେଡ୍ ପେ’ ଦିଆଯାଉଛି । କେବଳ ପ୍ରାଥମିକ ଶିକ୍ଷକଙ୍କ କ୍ଷେତ୍ରରେ ‘ସମାନ କାମକୁ ସମାନ ଦରମା’ ନୀତିର ଉଲ୍ଲଂଘନ କରାଯାଉଛି । ମହାସଂଘର ଆବାହକ ରାମଲାଲ ପଟେଲ ଘୋଷଣା କରିଛନ୍ତି ଯେ, ଦାବି ପୂରଣ ନହେବା ଯାଏଁ ସେମାନଙ୍କର ଏହି ପ୍ରତିବାଦ ଜାରି ରହିବ ।
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
