ଭୁବନେଶ୍ୱର: ଗଣଶିକ୍ଷାମନ୍ତ୍ରୀ ଆନ୍ଦୋଳନରେ ଥିବା ଶିକ୍ଷକମାନଙ୍କୁ କଡ଼ା ଚେତାବନୀ ଦେଇଛନ୍ତି। ସେ ସ୍ପଷ୍ଟ କରିଛନ୍ତି ଯେ, ଯଦି କୌଣସି ଶିକ୍ଷକ ଅମାନିଆ ହୁଅନ୍ତି କିମ୍ବା କର୍ତ୍ତବ୍ୟରେ ଅବହେଳା କରନ୍ତି, ତେବେ ସେମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ପିଲାଙ୍କ ପାଠପଢ଼ାକୁ ବନ୍ଦ କରି ଆନ୍ଦୋଳନ କରିବା ଠିକ୍ ନୁହେଁ ବୋଲି ମନ୍ତ୍ରୀ କହିଛନ୍ତି।
ସେ ଆହୁରି ମଧ୍ୟ କହିଛନ୍ତି ଯେ, ସରକାର ସବୁବେଳେ ଶିକ୍ଷକମାନଙ୍କ ସହ ଅଛନ୍ତି ଏବଂ ସେମାନଙ୍କ ଦାବି ଗୁଡିକୁ ନେଇ ବିଚାର କରୁଛନ୍ତି। ଯେଉଁ ଦାବିଗୁଡ଼ିକ ପୂରଣ କରାଯାଇ ପାରିବ, ସେସବୁ ନିଶ୍ଚିତ ଭାବରେ ପୂରଣ ହେବ। କିନ୍ତୁ କେବଳ ସରକାରଙ୍କ ଉପରେ ଚାପ ପକାଇଲେ କୌଣସି କାମ ହେବ ନାହିଁ। ଯାହା ଉଚିତ ତାହା ହିଁ କରାଯିବ ବୋଲି ମନ୍ତ୍ରୀ ଦୋହରାଇଛନ୍ତି।
ପ୍ରଥମେ ଗୋଟିଏ ଶିକ୍ଷକ ସଂଘ ଆନ୍ଦୋଳନ କରିବା ପରେ ଏବେ ଆଉ ଏକ ଶିକ୍ଷକ ସଂଘ ରାଜରାସ୍ତାକୁ ଓହ୍ଲାଇଛି। ଓଡ଼ିଶା କନିଷ୍ଠ ଶିକ୍ଷକ ସଂଘଆଜିଠାରୁ ଲୋୟର୍ ପିଏମଜି (Lower PMG) ଠାରେ ଧାରଣା ଆରମ୍ଭ କରିଛି। ସଂଘ ଅସନ୍ତୋଷ ପ୍ରକାଶ କରିଛି ଯେ, ୪ ମାସ ବିତି ଯାଇଥିଲେ ମଧ୍ୟ କନିଷ୍ଠ ଶିକ୍ଷକମାନଙ୍କୁ ନିୟମିତ (Regular) କରିବା ପାଇଁ ସରକାରୀ ନିର୍ଦ୍ଦେଶନାମା (Government Notification) ପ୍ରକାଶ ପାଇନାହିଁ।
ନିଜର ନିୟମିତକରଣ ଦାବିକୁ ନେଇ ସଂଘ ଆନ୍ଦୋଳନକୁ ଓହ୍ଲାଇ ଥିବାବେଳେ ଗଣଶିକ୍ଷାମନ୍ତ୍ରୀଙ୍କ କଡ଼ା ଆଭିମୁଖ୍ୟ ଶିକ୍ଷକ ମହଲରେ ଚର୍ଚ୍ଚାର ବିଷୟ ପାଲଟିଛି। ଶିକ୍ଷକମାନେ ନିଜ ଦାବି ହାସଲ ପାଇଁ ଅଡ଼ି ବସିଥିବା ବେଳେ ସରକାର ପାଠପଢ଼ା ପ୍ରଭାବିତ ନ ହେବାକୁ ଦୃଷ୍ଟିରେ ରଖି କାର୍ଯ୍ୟାନୁଷ୍ଠାନର ଚେତାବନୀ ଦେଇଛନ୍ତି। ଉଭୟ ଶିକ୍ଷକ ଏବଂ ସରକାରଙ୍କ ମଧ୍ୟରେ ଚାଲିଥିବା ଏହି ମୁହାଁମୁହିଁ ସ୍ଥିତି କେବେ ସମାଧାନ ହେଉଛି ତାହା ଦେଖିବାକୁ ବାକି ରହିଲା।
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
