ଭୁବନେଶ୍ବର: ଓଡ଼ିଶା ରାଜନୀତିରେ ଏବେ ବିଜେଡି ନେତା ଭି.କେ. ପାଣ୍ଡିଆନଙ୍କ ଭୂମିକାକୁ ନେଇ ଚର୍ଚ୍ଚା ଜୋର୍ ଧରିଛି। ବିଜେଡି ବିଧାୟକ ସମ୍ବିତ ରାଉତରାୟ ଦେଇଥିବା ବିବାଦୀୟ ବୟାନକୁ ଏବେ ସମର୍ଥନ କରିଛନ୍ତି ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ। ସମ୍ବିତଙ୍କ କଥାକୁ ଦୋହରାଇ ସେ ସ୍ପଷ୍ଟ କରିଛନ୍ତି ଯେ, ପାଣ୍ଡିଆନ୍ କେବେ ବି ଦଳର ନେତା ନଥିଲେ କି ନାହାନ୍ତି। ବିଜେଡିର ଜଣେ ଏବଂ ଅଦ୍ଵିତୀୟ ନେତା ହେଉଛନ୍ତି ନବୀନ ପଟ୍ଟନାୟକ।
ଗତକାଲି ସମ୍ବିତ ରାଉତରାୟ ଏକ ଗୁରୁତ୍ୱପୂର୍ଣ୍ଣ ବୟାନ ଦେଇ କହିଥିଲେ ଯେ, “ପାଣ୍ଡିଆନ୍ ଜଣେ ଭଲ ମ୍ୟାନେଜର ହୋଇପାରନ୍ତି, କିନ୍ତୁ ଆମେ ତାଙ୍କୁ କେବେ ବି ଆମର ନେତା ବୋଲି ଗ୍ରହଣ କରିନାହୁଁ।” ଆଜି ଏହି ପ୍ରସଙ୍ଗରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ପ୍ରମିଳା ମଲ୍ଲିକ କହିଛନ୍ତି ଯେ ସମ୍ବିତ ଯାହା କହିଛନ୍ତି ତାହା ସମ୍ପୂର୍ଣ୍ଣ ଠିକ୍। ପାଣ୍ଡିଆନଙ୍କୁ ନେଇ ଦଳର ନେତାମାନଙ୍କ ମଧ୍ୟରେ ଥିବା ଅସନ୍ତୋଷ ଏବେ ଧୀରେ ଧୀରେ ସାମ୍ନାକୁ ଆସୁଥିବା ପରି ମନେହେଉଛି।
ସମ୍ପ୍ରତି ବିଜେଡି ମଧ୍ୟରେ “ଭୋଜି ରାଜନୀତି” କୁ ନେଇ ଗୋଷ୍ଠୀ କନ୍ଦଳ ହେଉଥିବା ଚର୍ଚ୍ଚା ହେଉଛି। ତେବେ ଏହାକୁ ଖଣ୍ଡନ କରି ପ୍ରମିଳା କହିଛନ୍ତି ଯେ, ଦଳରେ କୌଣସି ପ୍ରକାର ଫାଟ ନାହିଁ। ସମସ୍ତେ ଏକଜୁଟ ଓ ସଂଗଠିତ ଅଛନ୍ତି। ନେତାମାନେ ପରସ୍ପର ସହ ଦେଖାସାକ୍ଷାତ କରିବା ବା ଏକାଠି ଭୋଜିଭାତ କରିବା ଏକ ସାଧାରଣ କଥା, ଏହାକୁ “ମେଳି” ବା ବିଦ୍ରୋହ କହିବା ଭୁଲ୍। ନିର୍ବାଚନ ପରେ ଅନେକ ଦିନ ଧରି ନେତାମାନଙ୍କ ମଧ୍ୟରେ ଦେଖା ହୋଇନଥିବାରୁ ଏହି ଭୋଜିର ଆୟୋଜନ କରାଯାଇଥିଲା।
ସମ୍ବିତ ରାଉତରାୟ ତାଙ୍କ ବୟାନରେ ୨୦୨୬ ବର୍ଷକୁ ନେଇ ଏକ ରହସ୍ୟମୟ ସୂଚନା ଦେଇଥିଲେ। ସେ କହିଥିଲେ ଯେ ୨୦୨୬ରେ ରାଜନୀତିରେ ବହୁତ କିଛି ପରିବର୍ତ୍ତନ ହେବ। ନିର୍ବାଚନ ସମୟରେ ଅନେକ ଘଟଣା ଘଟିଯାଇଛି, ଯାହାକୁ ଦଳ ଏବେ ସମୀକ୍ଷା କରୁଛି। ପୂର୍ବ ସରକାର ସମୟରେ ପାଣ୍ଡିଆନ୍ କେବଳ ଏକ ‘ଫ୍ୟାକ୍ଟର’ ଥିଲେ, କିନ୍ତୁ ଦଳୀୟ ସଂଗଠନ ଓ ନେତୃତ୍ୱ କେବଳ ନବୀନ ପଟ୍ଟନାୟକଙ୍କ ପାଖରେ ସୀମିତ ବୋଲି ବାରମ୍ବାର ଦର୍ଶାଯାଉଛି।
ବିଜେଡିର ଏହି ବରିଷ୍ଠ ନେତାମାନଙ୍କ ବୟାନରୁ ସ୍ପଷ୍ଟ ଜଣାପଡ଼ୁଛି ଯେ, ନିର୍ବାଚନ ପରାଜୟ ପରେ ଦଳ ଭିତରେ ପାଣ୍ଡିଆନଙ୍କ ସ୍ଥିତିକୁ ନେଇ ପୁନର୍ବିଚାର ଚାଲିଛି। ଆଗାମୀ ଦିନରେ ଦଳର ସଂଗଠନରେ କି ପ୍ରକାର ପରିବର୍ତ୍ତନ ଆସୁଛି, ତାହା ଦେଖିବାକୁ ବାକି ରହିଲା।
Author: Soloni Dash
ସମ୍ବାଦ ସ୍କୁଲ୍ ଅଫ୍ ମିଡିଆ ଏଣ୍ଡ କଲ୍ଚର୍ (Ssomac)ଭୁବନେଶ୍ୱରର ଛାତ୍ରୀ। ସାମ୍ବାଦିକତା ପାଠ୍ୟକ୍ରମ ସମାପ୍ତ ପରେ ରାଜ୍ୟର ପ୍ରମୁଖ ଗଣମାଧ୍ୟମ ସଂସ୍ଥାମାନଙ୍କ ସହ କାମ କରିବାର ଗଭୀର ଅନୁଭବ ରହିଛି। ରାଜନୀତି, ବିଜ୍ଞାନ, ଖେଳ ଓ ମନୋରଞ୍ଜନ ଭଳି ବିଭିନ୍ନ ବିଷୟରେ ଷ୍ଟୋରି ଲେଖନରେ ବିଶେଷ ରୁଚି ଓ ପାରଦର୍ଶିତା।
